परभणीत जुगार अड्ड्यावर छापा; २३ लाखाचा मुद्देमाल जप्त

एसपींच्या पथकाचे धाडसत्र सुरूच; मैराळ सावंगी शिवारातील कारवाई

परभणी (Illegal gambling raid) : जिल्हा पोलीस अधीक्षकांच्या विशेष पथकाने गंगाखेड तालुक्यातील मैराळ सावंगी शिवारात सुरू असलेल्या जुगार अड्ड्यावर मंगळवार २ जून रोजी सायंकाळी धडक कारवाई करत सहा जणांना ताब्यात घेतले. या कारवाईत रोख रक्कम, मोबाईल फोन, दुचाकी व चारचाकी वाहने असा एकूण २३ लाख ४७ हजार रुपयांचा मुद्देमाल जप्त करण्यात आला. याप्रकरणी सोनपेठ पोलिस ठाण्यात महाराष्ट्र जुगार प्रतिबंधक अधिनियमाच्या कलम १२ (अ) अन्वये गुन्हा दाखल करण्यात आला आहे.

लिंबाजी वाव्हळे यांनी दिलेल्या फिर्यादीनुसार, जिल्ह्यातील अवैध धंद्यांवर कारवाई करण्यासाठी विशेष पथक गस्त घालत असताना गुप्त माहिती मिळाली. मैराळ सावंगी शिवारातील खळी फाटा ते मैराळ सावंगी रस्त्यालगत बाभळीच्या झाडाखाली काही जण ‘झन्ना-मन्ना’ नावाचा जुगार खेळत असल्याची माहिती पथकाला मिळाली. यानंतर पोउपनि संदीप शिंदे, पोउपनि अर्जुन टर्वेâ, इर्शाद सय्यद, वाघमारे, सूर्य ताटीकोंडलवार, गोविंद चुडावकर यांच्यासह पथकाने घटनास्थळी सायंकाळी साडेचारच्या सुमारास छापा टाकला. यावेळी सहा जण पत्त्यांवर पैसे लावून जुगार खेळताना आढळून आले. पोलिसांनी त्यांना जागीच पकडून पंचांसमक्ष झडती घेतली.

या (Illegal gambling raid) कारवाईत आरोपींकडून रोख रक्कम, मोबाईल फोन तसेच घटनास्थळावर उभ्या असलेल्या पाच दुचाकी आणि दोन कार जप्त करण्यात आल्या. एकूण २३ लाख ४७ हजार रुपयांचा मुद्देमाल जप्त करण्यात आला आहे. या प्रकरणी माणिक काशीनाथ जाधव (रा. मैराळ सावंगी), विश्वनाथ किशनराव गायकवाड (रा. दैठणा), सुग्रीव ज्ञानोबा फटांगे (रा. गौंडगाव), नवनाथ तुकाराम जाधव, विठ्ठल सुभाषराव जाधव व अमोल बाबासाहेब जाधव (सर्व रा. मैराळ सावंगी) यांच्याविरुद्ध सोनपेठ पोलिस ठाण्यात गुन्हा दाखल करण्यात आला असून पुढील तपास सुरू आहे.