Ghot Health Check: घोटमध्ये दिनांक 08 मे 2026 रोजी पोलीस मदत केंद्राच्या वतीने मोफत आरोग्य तपासणी शिबिराचे आयोजन केले गेले. दत्ता मेघे हॉस्पिटलच्या टीमने शुगर, बीपी सह इतर आजारांची तपासणी केली.
घोट येथे शेकडो नागरिकांनी घेतला आरोग्य लाभ
घोट (Ghot Health Check) : घोट पोलीस मदत केंद्राच्या वतीने दिनांक 08 मे 2026 रोजी मोफत आरोग्य तपासणी शिबिराचे आयोजन करण्यात आले. दत्ता मेघे हॉस्पिटल, वर्धा येथील वैद्यकीय टीमने नागरिकांची आरोग्य तपासणी केली. शिबिरात शुगर, बीपी तसेच विविध लहान-मोठ्या आजारांची तपासणी करण्यात आली. गंभीर स्वरूपातील रुग्णांना पुढील उपचारासाठी नागपूर येथे पाठविण्यात येणार असल्याची माहिती यावेळी देण्यात आली.या आरोग्य शिबिराचे उद्घाटन घोट ग्रामपंचायतीच्या सरपंच रूपाली दुधबावरे यांच्या हस्ते करण्यात आले. कार्यक्रमाच्या अध्यक्षस्थानी शालिनीताई मेघे हॉस्पिटल, नागपूर येथील डॉ. जीवक काकडे हे उपस्थित होते.
याप्रसंगी घोट पोलीस मदत केंद्राचे सहाय्यक पोलीस निरीक्षक किशोर शिंदे, मानव अधिकार माहिती पत्रकार सेनेचे जिल्हाध्यक्ष रूम्पा शाहा, ग्रामपंचायत सदस्य आशा उपाध्ये, लीना विश्वास, डॉ. अंशिका पुनिया, डॉ. मेहता, डॉ. राहुल कुंभारे, डॉ. प्रकाश तसेच वैद्यकीय कर्मचारी उपस्थित होते. या शिबिरात शेकडो नागरिकांनी उपस्थित राहून आरोग्य तपासणी करून घेतली. पोलीस विभागाच्या सामाजिक बांधिलकीतून आयोजित करण्यात आलेल्या या उपक्रमाचे नागरिकांनी कौतुक केले.
कार्यक्रमाचे प्रस्ताविक सहाय्यक पोलीस निरीक्षक किशोर शिंदे यांनी केले, तर संचालन फौजदार प्रकाश बर्डे यांनी केले. आभार प्रदर्शन गौतम दुर्गे यांनी मानले. कार्यक्रमाला घोट परिसरातील नागरिक मोठ्या संख्येने उपस्थित होते.