उत्तर प्रदेशातील आग्रा येथे समोर आलेल्या एका खळबळजनक प्रकरणाने सर्वांनाच हादरवून सोडले आहे.
पतीच्या हत्येनंतर मृतदेह बाथरूममध्ये पुरल्याचा आरोप; नवीन फरशीमुळे पोलिसांना आला संशय, आरोपी पत्नीची कबुली असल्याचा दावा
आग्रा (Agra Murder Case) : उत्तर प्रदेशातील आग्रा येथे समोर आलेल्या एका खळबळजनक प्रकरणाने सर्वांनाच हादरवून सोडले आहे. तब्बल 45 दिवसांपासून बेपत्ता असलेल्या व्यक्तीचा सांगाडा अखेर त्याच्याच घरातील बाथरूमच्या फरशीखालून आढळून आला. घरातील बाथरूममध्ये नुकतीच बसविण्यात आलेली नवीन फरशी पोलिसांच्या संशयाचे कारण ठरली आणि त्यातून या संपूर्ण हत्याकांडाचा उलगडा झाला.
देशात यापूर्वी सोनम रघुवंशी आणि सिया गोयल प्रकरणांमुळे खळबळ उडालेली असताना, आग्र्यातील या घटनेने पुन्हा एकदा सर्वांचे लक्ष वेधले आहे. या प्रकरणात आरोपी पत्नीचे नाव रूबी सुरेंद्र शर्मा असून मृत पतीचे नाव सुरेंद्र कुमार शर्मा आहे.
प्राथमिक चौकशीनुसार, सुरेंद्र कुमार शर्मा हे वारंवार मद्यपान करत असून पत्नीला मारहाण करत असल्याची माहिती समोर आली आहे. या त्रासाला कंटाळून सुमारे दीड महिन्यापूर्वी रूबीने पतीची हत्या केल्याचा आरोप आहे. त्यानंतर तिने मृतदेह घरातील बाथरूममध्ये पुरून त्यावर सिमेंट टाकून फरशी बसविल्याचे तपासात समोर आले आहे.
घटनेनंतर रूबीने पती बेपत्ता झाल्याची तक्रारही पोलिसांकडे दाखल केली होती. तपासादरम्यान ती पोलिसांसोबत सीसीटीव्ही फुटेज पाहण्यासाठी गेली होती आणि पतीच्या आठवणीने परिसरात रडल्याचाही दावा करण्यात आला आहे. मात्र, शुक्रवारी तिने आपल्या दीराला या घटनेची माहिती दिल्यानंतर प्रकरणाला नवे वळण मिळाले. त्यानंतर पोलिसांनी बाथरूमची फरशी उखडून पाहिली असता तेथे मानवी सांगाडा आढळून आला.
या प्रकरणात पोलिसांनी रूबीला ताब्यात घेतले असून तिची सखोल चौकशी सुरू आहे. पोलिसांच्या माहितीनुसार, चौकशीदरम्यान तिने गुन्ह्याची कबुली दिल्याचा दावा करण्यात आला आहे. तसेच, घटनेपूर्वी बाथरूमचे काम पूर्ण करण्यासाठी मेकॅनिक आणि मजूर बोलावण्याची तयारी करण्यात आली होती, अशी माहितीही तपासात समोर आली आहे. मात्र, या हत्येमागील नेमका हेतू तपास पूर्ण झाल्यानंतर आणि इतर पुरावे समोर आल्यानंतरच स्पष्ट होणार असल्याचे पोलिसांनी सांगितले आहे.
दरम्यान, मृत सुरेंद्र कुमार शर्मा यांचा मृतदेह पोस्टमार्टमसाठी पाठविण्यात आला असून या प्रकरणाचा पुढील तपास सुरू आहे.