परभणीतील मुळी येथील तरुणाकडून धारदार तलवार जप्त

परभणीच्या स्थागुशा पथकाची कारवाई

परभणी (sword confiscated) : गंगाखेड तालुक्यातील मुळी येथील एका तरुणाकडे विनापरवाना बेकायदेशीररित्या धारदार तलवार असल्याची माहिती मिळताच स्थागुशाच्या पथकाने रविवार ३ मे रोजी रात्री केलेल्या कारवाईत तलवार जप्त करत तरुणाविरुद्ध गुन्हा दाखल केला आहे.

याबाबत समजलेली अधिक माहिती अशी की जिल्ह्याचे पोलीस अधिक्षक रविंद्रसिंह परदेशी यांची बदली झाल्यानंतर पोलीस अधिक्षक पंकज कुमावत यांनी परभणी जिल्ह्याच्या पदभार घेताच जिल्ह्यात चालणारे अवैध व्यवसाय करणाऱ्या विरुद्ध व विनापरवाना शस्त्र बाडगणाऱ्याविरुद्ध कडक कारवाई करण्याच्या सूचना दिल्याने स्थागुशाचे पोलीस निरीक्षक विवेकानंद पाटील यांच्या मार्गदर्शनाखाली पोलीस उपनिरीक्षक चंदनसिंह परिहार, पोह. महेश कवठाळे, पोह. राहुल परसोडे, पोह. माणिक वाघ, पोशि. दिलीप निलपत्रेवार, पोशि. शरद सावंत, पोशि. परसराम गायकवाड आदींचे पथक रविवार ३ मे रोजी रात्री गंगाखेड परिसरात गस्तीवर असतांना हे पथक धारखेड येथे आले.

मुळी येथील एका तरुणाजवळ विनापरवाना बेकायदेशीररित्या बाळगलेली तलवार असल्याची गोपनीय माहिती मिळाल्याने या (sword confiscated) पथकाने रविवार रोजी सायंकाळी ७:३० वाजेच्या सुमारास मुळी गावातील धारखेड रस्त्यावर पाहणी केली असता झाडाखाली उभ्या असलेल्या सौरभ परमेश्वर कांबळे वय २१ वर्ष याच्याजवळ ३ फुट लांबीची धारदार लोखंडी तलवार मिळून आली. त्यास शस्त्रासह ताब्यात घेऊन गंगाखेड पोलीस ठाण्यात आणून पो.शि. शरद सावंत यांनी दिलेल्या फिर्यादीवरून सौरभ कांबळे याच्याविरुद्ध शस्त्र अधिनियमाच्या विविध कलमान्वये गुन्हा दाखल केला असुन याचा तपास जनदार विनोद चव्हाण हे करीत आहेत.