हिंगोली (Hingoli Rural Police) : लाख (मेथा) येथील शिक्षकाची दुचाकी थांबवून दोन भामट्यांनी तीन लाख रुपयाच्या सोन्याच्या अंगठ्या सीआयडी असल्याची बतावणी करून लांबविल्याची घटना घडल्याने हिंगोली ग्रामीण पोलिसात गुन्हा दाखल करण्याची प्रक्रीया सुरू होती.
औंढा नागनाथ तालुक्यातील लाख (मेथा) मधोमती माध्यमिक विद्यालयातील प्रताप नाथराव पतंगे हे शिक्षक म्हणुन कार्यरत असुन हिंगोली येथून दररोज शाळेच्या वेळेनुसार ये जा करीत असतात. ८ सप्टेंबर रोजी सकाळी ८.४५ च्या सुमारास नेहमी प्रमाणे हिंगोलीतून मोटार सायकलवरून हिंगोली ते औंढा नागनाथ रस्त्याने लाखा मेथा येथील शाळेवर जाण्याकरीता निघाले होते. तेवढ्यात पाठीमागून एका मोटार सायकलवरील दोघांनी येऊन पतंगे यांची मोटार सायकल थांबविण्यास सांगितले असता त्यांनी रस्त्याच्या बाजूला मोटार सायकल थांबविली. याचवेळी मोटार सायकलवरील एका व्यक्तीने आम्ही सीआयडी पोलिस असुन समोर गांजा पकडलेला असल्याने काही इसम चाकुने हल्ला करीत आहेत.
त्यामुळे तुम्ही सावध रहा असे सांगुन तुमच्या खिशात काय आहे अशी विचारणा पतंगे यांच्याकडे केली असता खिशामध्ये मोबाईल व रुमाल असल्याचे त्यांनी सांगितले. यावेळी भामट्याने पतंगे यांच्या हातातील रुमाल घेऊन मोटार सायकलच्या सीटवर ठेवून तुमच्या खिशातील मोबाईल, पैसे व हातातील सोन्याच्या अंगठ्या काढून यामध्ये ठेवा असे सांगितल्याने पतंगे यांनी मोबाईल सोन्याच्या तीन अंगठ्या रुमालात ठेवल्यावर भामट्यांनी रुमालाची गाठ मारून दिली. त्यानंतर पतंगे यांना जाण्याकरीता सांगितले असता ते शाळेकडे निघून गेले.
शाळेत पोहचल्यानंतर रूमालाची गाठ उघडून पाहीली असता त्यात केवळ मोबाईल दिसून आला. त्यामुळे त्यांनी हिंगोली ग्रामीण पोलिसात तक्रार देऊन तीन तोळ्याच्या तीन लाखांच्या अंगठ्या लांबविल्याचे नमुद केले. याबाबत गुन्हा दाखल करण्याची प्रक्रीया सुरू होती.
