मुंबई (Sextortion Case) : मुंबई पोलिसांनी गुरुवारी दिलेल्या माहितीनुसार, जम्मू-काश्मीर टी-२० लीगशी संबंधित असलेल्या एका महिला क्रिकेटपटूसह तिचा भाऊ आणि आणखी एका साथीदाराला कथित सेक्सटॉर्शन आणि खंडणी प्रकरणात अटक करण्यात आली आहे.
मुंबई क्राइम ब्रँचच्या प्रवक्त्यांनी सांगितले की, संबंधित महिला क्रिकेटपटू आणि तिच्या भावाला नवी दिल्लीतील एका हॉटेलमधून ताब्यात घेण्यात आले. त्यानंतर त्यांचा साथीदार उद्दीन इम्तियाज वानी (वय २२) याला श्रीनगर (जम्मू-काश्मीर) येथून अटक करण्यात आली. अटक करण्यात आलेल्या आरोपींची नावे फरखंदा खान (वय ३०) आणि तिचा भाऊ बाजिल खान (वय २७) अशी आहेत.
क्राइम ब्रँचच्या माहितीनुसार, तक्रारदार हा मुंबईतील कुलाबा परिसरात राहणारा २८ वर्षीय व्यावसायिक आहे. २०२४ मध्ये तो पश्चिम उपनगरात राहत असताना त्याची ओळख फरखंदा खानशी झाली. मोबाईल चॅटद्वारे दोघांमध्ये संपर्क वाढत गेला आणि त्यानंतर आरोपीने कथितपणे त्याच्याशी अश्लील स्वरूपाच्या संवादाला सुरुवात केली.
यानंतर फरखंदाने त्याची ओळख तिचा भाऊ बाजिल खान आणि साथीदार उद्दीन इम्तियाज वानी यांच्याशी करून दिली. पोलिसांच्या माहितीनुसार, २०२४ मध्ये फरखंदाने आर्थिक गरज असल्याचे सांगत तक्रारदाराकडे पैशांची मागणी केली. त्याने नकार दिल्यानंतर, खासगी चॅट सार्वजनिक करण्याची धमकी देत त्याच्याकडून पैसे उकळण्यास सुरुवात केली.
दबावाखाली येऊन तक्रारदाराने ३० एप्रिल २०२४ ते १३ जानेवारी २०२६ या कालावधीत ३२ बँक व्यवहारांद्वारे एकूण २३.६१ लाख रुपये फरखंदाच्या खात्यात जमा केले. तपासात समोर आले की, या रकमेपैकी मोठा हिस्सा उद्दीन वानीच्या खात्यात वळवण्यात आला होता. तसेच काही रक्कम फरखंदाच्या वडिलांच्या, अब्दुल अझीझ खान यांच्या खात्यातही जमा झाल्याचे आढळले.
याशिवाय, वानी आणि बाजिल खान यांनीही तक्रारदाराला धमकावत त्याच्याकडून आणखी पैसे उकळले. त्यांनी फरखंदासोबतच्या चॅटचे स्क्रीनशॉट असल्याचे सांगत, ते सार्वजनिक करण्याची आणि त्याला अटक होण्याची भीती दाखवली. या धमक्यांमुळे जानेवारी २०२६ मध्ये तक्रारदाराने आरोपींना आणखी ४० लाख रुपये दिल्याचे समोर आले आहे. या प्रकरणातील पहिला व्यवहार एप्रिल २०२४ मध्ये २० हजार रुपयांचा असल्याचेही तपासात निष्पन्न झाले.
फरखंदा खान ही दिल्ली-एनसीआरमधील अंकुर विहार (DLT) परिसरातील रहिवासी आहे, तर उद्दीन इम्तियाज वानी हा जम्मू-काश्मीरमधील खालापूर येथील आणि बाजिल खान हा नूरखाव गावचा रहिवासी असल्याचे पोलिसांनी सांगितले.
या प्रकरणी वेस्ट रिजन सायबर पोलिस ठाण्यात भारतीय न्याय संहिता (BNS) कलम ३०८(२), ३०८(६), ३५१(२), ३५१(३) तसेच आयटी अ‍ॅक्टच्या कलम ६१(२) आणि ३(५) अंतर्गत गुन्हा दाखल करण्यात आला आहे. पुढील तपास सुरू असून, आरोपींनी इतर कोणाला अशाच प्रकारे जाळ्यात ओढले आहे का आणि उकळलेली रक्कम नेमकी कशासाठी वापरली गेली, याचाही तपास केला जात आहे.
