सेनगाव (Forest Department rescue) : पाण्याच्या शोधात भटकत असताना विहिरीत पडलेल्या एका कोल्ह्याला प्राणीमित्र व वन विभागाच्या कर्मचाऱ्यांनी संयुक्त प्रयत्नातून सुखरूप बाहेर काढत जीवनदान दिल्याची घटना सेनगाव तालुक्यातील पार्डी पोहकर येथे घडली. या संवेदनशील आणि तत्पर बचावकारवाईचे परिसरात कौतुक होत आहे. मिळालेल्या माहितीनुसार, पार्डी पोहकर येथील शेतकरी निवृत्ती खंदारे यांच्या शेतातील विहिरीत एक कोल्हा पडल्याचे निदर्शनास आले.
पाण्याच्या शोधात असताना तो विहिरीत कोसळल्याचा अंदाज व्यक्त करण्यात येत आहे. याची माहिती मिळताच प्राणीमित्र सर्जेराव खंदारे यांनी वेळ न दवडता वन विभागाशी संपर्क साधला. माहिती मिळाल्यानंतर सेनगाव वन विभागाचे कर्मचारी तातडीने घटनास्थळी दाखल झाले. प्राणीमित्रांच्या मदतीने काळजीपूर्वक बचावकार्य (Forest Department rescue) राबवून कोल्ह्याला सुखरूप बाहेर काढण्यात आले. विहिरीबाहेर आल्यानंतर कोल्ह्याने जंगलाच्या दिशेने धूम ठोकत सुरक्षित मार्ग धरला.
दरम्यान, तालुक्यात यंदा अनेक भागांत पाणीटंचाईची तीव्रता वाढली असून विहिरी व बोरवेल कोरड्या पडण्याच्या स्थितीत आहेत. त्यामुळे वन्य प्राण्यांनाही पाण्यासाठी भटकंती करावी लागत असल्याचे चित्र आहे. अशा परिस्थितीत वेळेवर केलेल्या या (Forest Department rescue) बचाव कारवाईमुळे एका मुक्या जीवाचे प्राण वाचल्याने प्राणीमित्र आणि वन विभागाच्या कर्मचाऱ्यांवर अभिनंदनाचा वर्षाव होत आहे.
