सरकारला भानावर आणण्यासाठी आंदोलन जनतेत घेऊन जाऊ : कॉ. होळीकर
लातूर (Latur Bank Employees' Protest) : "बाराव्या द्विपक्ष कराराला 900 दिवस होऊनही केंद्र सरकार अंमलबजावणी करीत नाही. हे म्हणजे जुमलेबाज व खोटारडे असून पाच दिवसांचा आठवडा करण्याचा करार करून तो तब्बल दोन वर्षाहून अधिक काळ अंमलबजावणी करीत नाही. त्यामुळे आता आपणास शेतकरी आंदोलन आणि जंतर मंतर वरील जेन झी आंदोलनाने निर्वाणीचा लढा कसा द्यावा, ते शिकविले आहे. या मुजोर सत्तेला जोवर धक्का दिला जात नाही, तोवर हे निगरगट्ट सत्ताधारी भानावर येणार नाहीत. म्हणून आपले आंदोलन तीव्र आणि सर्व जनतेत घेऊन जाऊ या", असे आवाहन लातूर बँक कर्मचाऱ्यांचे नेते कॉ. उत्तम होळीकर यांनी केले.
लातूर आणि परिसरातील बँक कर्मचारी (Latur Bank Employees' Protest) आणि अधिकारी यांनी बुधवारी (दि.12) स्टेट बँक ऑफ इंडिया परिसरात तीव्र आंदोलन करून विविध घोषणाद्वारे हा परिसर दणाणून सोडला. या आंदोलनात भारतीय मजदूर संघ याचे शी संलग्न अशा अत्यंत नगण्य सभासद असलेल्या एन ओ बी डब्ल्यू आणि एन ओ बी ओ या भाजप धार्जिण्या संघटनांनी अपप्रचार करून निर्मला सीतारामन यांचेशी साटेलोटे केल्यामुळे या दोन्ही संघांना युनायटेड फोरम ऑफ बँक युनियन्स (UFBU) या बँकेतून एकत्र आलेल्या फोरम मधून काढून टाकण्यात आल्याची माहिती युवा बँक कर्मचारी नेते कॉ.दीपक माने यांनी भारतीय मजदुर संघाच्या सर्व कटकारस्थानासह समजावून सांगितले.
याप्रसंगी अधिकारी संघटनेचे नेते कॉ.विवेक पदरे, कॉ.जयप्रकाश, तसेच स्टेट बँक कर्मचारी नेत्या कॉ.अंजली स्वामी यांनी आपल्या मागण्या आणि भारत सरकारच्या जुमलेबाजीचा खरपूस समाचार घेऊन सर्वांनी एकजुटीने प्रदीर्घ संघर्ष करण्याची तयारी ठेवण्याचे आवाहन केले.
या प्रसंगी युनायटेड फोरमचे आक्रमक युवा नेते कॉ.परमेश्वर बडगिरे यांच्या आक्रमक घोषणांनी एक चैतन्य निर्माण केले तर कॉ. आकांक्षा, कॉ.ज्युली या तरुण युवतींनी बँकिंग क्षेत्रातील जेन झी चे कल्पक रूप दाखवून आंदोलक युवकांना आक्रमक घोषणाबाजीतून नृत्य करण्यास प्रोत्साहित केले. याप्रसंगी कॉ.अस्मिता वाघमारे, कॉ.उदय मोरे, कॉ.रेश्मा भवरे कॉ. सुधीर मोरे, कॉ.जयमाला शिंदे, कॉ.राधिका मुंदडा, कॉ.महेश घोडके यांचेसह जवळपास 150 कर्मचारी आणि अधिकारी यांनी सहभाग घेतला.
