नांदेड–हिंगोली जिल्हा सीमेवरील वरूड तांडा शिवारात रात्री उशिरा कारवाई; एकाविरुद्ध गुन्हा दाखल
आखाडा बाळापूर : नांदेड–हिंगोली जिल्हा सीमेवरील वरूड तांडा परिसरात अवैध वाळू वाहतूक करणाऱ्या हायवा टिप्परवर स्थानिक गुन्हे शाखेच्या (LCB) पोलिस पथकाने कारवाई केली. या कारवाईत वाहन आणि 5 ब्रास वाळू असा एकूण 20 लाख 25 हजार रुपयांचा मुद्देमाल जप्त करण्यात आला. याप्रकरणी 11 जुलै रोजी पहाटे एकाविरुद्ध गुन्हा दाखल करण्यात आला.
नांदेड जिल्ह्यातून मोठ्या प्रमाणात अवैधरीत्या वाळूचा उपसा करून हायवा टिप्परच्या माध्यमातून हिंगोली जिल्ह्यात वाहतूक केली जात असल्याची माहिती होती. त्यानुसार 10 जुलै रोजी रात्री स्थानिक गुन्हे शाखेच्या पोलिस पथकाने नांदेड–हिंगोली जिल्हा सीमेवरील वरूड तांडा शिवारात कारवाई करत अवैध वाळू वाहतूक करणारा हायवा टिप्पर पकडला.
ही कारवाई पोलिस अधीक्षक श्रेणिक लोढा आणि एलसीबी पोलिस निरीक्षक मोहन भोसले यांच्या मार्गदर्शनाखाली करण्यात आली. कारवाईत एलसीबी पोलिस उपनिरीक्षक माधवराव जिव्हारे, भुजंग कोकरे, हरिभाऊ गुंजकर, आजम प्यारेवाले, हराळ, मिरे, सावंत आणि खंडागळे यांच्या पथकाने सहभाग घेतला.
पोलिसांनी हायवा टिप्पर आणि त्यातील 5 ब्रास वाळू असा एकूण 20 लाख 25 हजार रुपयांचा मुद्देमाल जप्त केला. स्थानिक गुन्हे शाखेचे पोलिस कर्मचारी भुजंग कोकरे यांच्या फिर्यादीवरून प्रज्वल सदाशिव दुधमल, रा. धानोरा मोत्या, ता. पूर्णा याच्याविरुद्ध आखाडा बाळापूर पोलिस ठाण्यात कलम 303(2) BNS सह कलम 48(7)(8) गौण खनिज अधिनियम अंतर्गत कारवाई करण्यात आली आहे.
या प्रकरणाचा पुढील तपास पोलिस निरीक्षक शरद मरे यांच्या मार्गदर्शनाखाली डोंगरकडा पोलिस चौकीचे बीट प्रमुख संतोष नागरगोजे करीत आहेत.
