हिंगोली (Hingoli Census 2027) : भारत सरकारने जनगणना 2027 चा कार्यक्रम जाहीर केल्यानंतर हिंगोली नगरपरिषदेने तयारीला वेग दिला आहे. याचाच एक भाग म्हणून आजपासून तीन दिवसीय विशेष प्रशिक्षणाला सुरुवात झाली. नगरपरिषदेचे मुख्याधिकारी तथा चार्ज ऑफिसर श्री. अरविंद मुंढे यांच्या प्रमुख उपस्थितीत हे प्रशिक्षण सुरू झाले. या प्रशिक्षणात एकूण 85 प्रगणक व पर्यवेक्षक सहभागी झाले असून, पहिल्याच दिवशी सर्वांची 100 टक्के उपस्थिती नोंदवली गेली.
जनगणनेचा (Hingoli Census 2027) पहिला टप्पा, म्हणजेच घरांची यादी व घर गणना, 16 मे 2026 ते 14 जून 2026 या कालावधीत पार पडणार आहे. यासाठी फिल्ड ट्रेनर, पर्यवेक्षक व प्रगणक यांची नेमणूक करण्यात आली असून, त्यांना डिजिटल पद्धतीने जनगणना कशी करावी याचे सविस्तर प्रशिक्षण दिले जात आहे.
यंदाच्या जनगणनेचे सर्वात महत्त्वाचे वैशिष्ट्य म्हणजे नागरिकांना ‘स्वगणना’ म्हणजेच Self Enumeration ची सुविधा उपलब्ध करून देण्यात आली आहे. नागरिकांना दि. 1 मे 2026 ते 15 मे 2026 या कालावधीत http://se.census.gov.in या संकेतस्थळावर स्वतःची व कुटुंबाची माहिती भरता येणार आहे. मुख्याधिकारी अरविंद मुंढे यांनी नागरिकांना या संधीचा लाभ घेण्याचे आवाहन केले आहे. स्वगणना जनतेतूनच होणार असल्याने प्रगणक व पर्यवेक्षकांनी याबाबत नागरिकांमध्ये जनजागृती करावी, असेही त्यांनी सांगितले. कोणतेही घर गणनेपासून वगळले जाणार नाही याची दक्षता घेण्याच्या सूचना देण्यात आल्या आहेत.
आज सुरू झालेल्या प्रशिक्षणाला फिल्ड ट्रेनर श्री. सुनिल कांबळे, अण्णाजी मडावे, अनिल परसावळे, प्रमोद कांबळे तसेच नगर अभियंता प्रतिक नाईक, जनगणना विभाग प्रमुख सचिन पवार व इतर कर्मचारी उपस्थित होते. डिजिटल पद्धतीमुळे जनगणनेचे काम अधिक अचूक आणि जलद होण्यास मदत होणार असून, (Hingoli Census 2027) हिंगोलीत जनगणना 2027 यशस्वीपणे पार पाडली जाईल, असा विश्वास यावेळी व्यक्त करण्यात आला.
