इराण–अमेरिका तणावाचा परिणाम; ‘पॅनिक’मुळे इंधन टंचाईची भीती
उदगीर (Fuel Shortage Fear) : इराण–अमेरिका तणावाच्या पार्श्वभूमीवर संभाव्य इंधनटंचाईच्या अफवांनी उदगीर शहरात मोठी घबराट पसरली असून पेट्रोल पंपांवर पहाटेपासूनच वाहनधारकांची मोठी गर्दी उसळल्याचे चित्र दिसून आले. “पेट्रोल मिळणार नाही” या भीतीने नागरिकांनी दुचाकी व चारचाकी वाहनांसह पंपांवर रांगा लावल्या.
आज सकाळपासून अनेक पेट्रोल पंपांवर वाहनांच्या लांबलचक रांगा लागल्या होत्या. काही ठिकाणी नागरिकांनी अतिरिक्त कॅनमध्येही पेट्रोल साठवण्याचा प्रयत्न केल्याने परिस्थिती अधिकच तणावपूर्ण झाली. दरम्यान, काही पंपांवर इंधन संपल्याने ‘नो पेट्रोल’चे फलक लावून पंप तात्पुरते बंद ठेवावे लागल्याचेही समोर आले.
स्थानिक नागरिकांच्या मते, सोशल मीडियावर फिरणाऱ्या संदेशांमुळे भीतीचे वातावरण निर्माण झाले आहे. “युद्धामुळे इंधनपुरवठा खंडित होणार” अशा चर्चांमुळे लोकांनी घाईघाईत इंधन भरण्यासाठी धाव घेतली. परिणामी, नेहमीपेक्षा अनेकपटीने मागणी वाढल्याने काही पंपांवर तात्पुरती टंचाई जाणवली.
दरम्यान, प्रशासन व पेट्रोलियम वितरकांकडून नागरिकांना अफवांवर विश्वास न ठेवण्याचे आवाहन करण्यात येत आहे. इंधनाचा पुरवठा नियमित सुरू असून अनावश्यक साठेबाजी टाळावी, असेही स्पष्ट करण्यात आले आहे.
अफवांवर विश्वास न ठेवण्याचे आवाहन
प्रशासनाने नागरिकांना संयम बाळगण्याचे व आवश्यक तेवढेच इंधन भरण्याचे आवाहन केले आहे. अनावश्यक गर्दीमुळे कायदा व सुव्यवस्थेचा प्रश्न निर्माण होऊ शकतो, त्यामुळे सहकार्य करण्याची गरज व्यक्त केली जात आहे.
कांही पेट्रोल पंपावर रांगाच रांगा तर काही पेट्रोल पंप बंद
उदगीर शहरातील कांही पेट्रोल पंपावर लांबच लांब रांगा दिसून येत आहेत तर कांही पेट्रोल पंपावर नो पेट्रोल चे फलक दिसुन येत आहेत त्यामूळे वाहनधारकात चिंता पसरली आहे. परस्थिती जाणून घेण्यासी प्रशासनाशी संपर्क साधण्याचा प्रयत्न केला आसता संपर्क होवू शकलाा नसल्याने प्रतीक्रीया कळे शकली नाहि.
