उदगीर : जिद्द असेल तर परिस्थिती कितीही प्रतिकूल असो, यशाला गवसणी घालता येते, हे उदगीर तालुक्यातील नळगीर तांड्यातील शेतकरी पुत्र रोहित दिलीप पवार याने आपल्या यशातून सिद्ध केले आहे. शेतीच्या मातीत वाढलेल्या रोहितने नीट परीक्षेत पहिल्याच प्रयत्नात तब्बल ५१५ गुणांची दमदार कामगिरी करत रत्नागिरी येथील शासकीय वैद्यकीय महाविद्यालयात एमबीबीएस अभ्यासक्रमासाठी प्रवेश मिळवला आहे. विशेष म्हणजे, चार पिढ्यांनंतर नळगीर तांड्यातून पहिला एमबीबीएस डॉक्टर होण्याचा मान रोहितला मिळणार आहे. त्यामुळे त्याच्या यशाने संपूर्ण तांड्याचा उर अभिमानाने भरून आला आहे.
रोहितचे वडील दिलीप पवार हे शेतकरी आहेत. शेती व्यवसाय करत असतानाही त्यांनी मुलाच्या शिक्षणाला सर्वोच्च प्राधान्य दिले. परिस्थितीची कोणतीही सबब न सांगता रोहितने अभ्यासात सातत्य ठेवले. मेहनत, जिद्द, आत्मविश्वास आणि ध्येयावरची अढळ निष्ठा या जोरावर त्याने नीटसारख्या कठीण परीक्षेत यश मिळवले.
कुटुंबाच्या त्यागाला मिळाले यशाचे फळ!
रोहितच्या यशामागे वडील दिलीप पवार यांच्यासह संपूर्ण कुटुंबाचे मोठे योगदान आहे. किरण पवार, पूजा पवार आणि प्रांजली पवार यांनीही त्याला अभ्यासाच्या काळात सातत्याने मार्गदर्शन व प्रोत्साहन दिले. कुटुंबाच्या या पाठबळामुळे रोहितने वैद्यकीय शिक्षणाचे स्वप्न प्रत्यक्षात उतरवण्याच्या दिशेने ऐतिहासिक पाऊल टाकले.
रोहितच्या यशाची वार्ता समजताच नळगीर तांड्यात आनंदाचे वातावरण निर्माण झाले असून, ग्रामस्थ, नातेवाईक, मित्रपरिवार आणि विविध स्तरांतून त्याच्यावर अभिनंदनाचा वर्षाव होत आहे.
एका शेतकरी कुटुंबाच्या स्वप्नाला मिळालेली ही भरारी आता संपूर्ण नळगीर तांड्याची प्रेरणा ठरली आहे. ‘शेतकऱ्याच्या घरातूनही डॉक्टर घडतो’ हा आत्मविश्वास रोहितने आपल्या कर्तृत्वातून जागवला आहे.
