१ कोटी ३७ लाखांचा मुद्देमाल जप्त; पाच गणेश मंडळांच्या सदस्यांविरुद्ध गुन्हा दाखल
माहूर : तालुक्यातील लखमापूर येथे गणेश विसर्जन मिरवणुकीदरम्यान प्रतिबंधित डीजे सिस्टीमचा वापर केल्याप्रकरणी माहूर पोलिसांनी पाच गणेश मंडळांच्या सदस्यांविरुद्ध गुन्हा दाखल केला आहे. या कारवाईत डीजेसह चार वाहने असा एकूण १ कोटी ३७ लाख रुपयांचा मुद्देमाल पोलिसांनी ताब्यात घेतला आहे. दरम्यान, एक डीजे वाहन मिरवणुकीतून निघून गेल्याचे पोलिसांच्या फिर्यादीत नमूद करण्यात आले आहे.
डीजेच्या कर्णकर्कश आवाजावर बंदी असतानाही तसेच पोलिस प्रशासनाने दिलेल्या सूचनांचे पालन न करता डीजे वाजविण्यात आल्याचे पोलिसांनी नमूद केले आहे. याप्रकरणी लखमापूर बीटचे कॉन्स्टेबल संदीप गोपनवाड यांच्या २४ सप्टेंबर रोजीच्या फिर्यादीवरून लखमापूर येथील पाच गणेश मंडळांच्या सदस्यांविरुद्ध गुन्हे दाखल करण्यात आले.
या कारवाईदरम्यान चार डीजे आणि त्यांची वाहने असा एकूण १ कोटी ३७ लाख रुपयांचा मुद्देमाल जप्त करण्यात आला आहे.
सदर प्रकरणाचा पुढील तपास उपविभागीय पोलीस अधिकारी किरण कुमार भोंडवे आणि पोलीस निरीक्षक देविदास चोपडे यांच्या मार्गदर्शनाखाली सहाय्यक पोलीस निरीक्षक शरद घोडके करीत आहेत.
