हिंगोली : हिंगोली शहरातील नवा मोंढा भागात दरवर्षी मोठ्या उत्साहात होणारा दांडिया-मस्ती महोत्सव यंदा दुष्काळाच्या पार्श्वभूमीवर रद्द करण्यात आला आहे. या महोत्सवावर होणारा संपूर्ण खर्च दुष्काळग्रस्त शेतकऱ्यांच्या मदतीसाठी मुख्यमंत्री सहायता निधीत जमा करण्यात येणार असल्याची घोषणा आयोजकांच्या वतीने करण्यात आली आहे.
युवा फ्रेंड्स असोसिएशन आणि श्रीराम बाल गणेश मंडळाच्या वतीने दरवर्षी नवरात्रोत्सवात हा भव्य दांडिया महोत्सव आयोजित केला जातो. यंदा जिल्ह्यात दुष्काळी परिस्थिती गंभीर असल्याने सामाजिक बांधिलकी जपत हा निर्णय घेण्यात आला आहे.
या कार्यक्रमासाठी येणारा खर्च वाचवून तो थेट शेतकऱ्यांच्या मदतीसाठी देण्याचा निर्णय मंडळाचे अध्यक्ष केशव दुबे, सागर तापडिया, विशाल बडजाते, सुमित बडेरा, गोपाल बाहेती, डॉ. नितीन पुरोहित, अंकुश जैस्वाल, शैलेश जैस्वाल, संदीप गीते, विशाल सोनी, सावन तोषनीवाल व इतर पदाधिकाऱ्यांच्या वतीने जाहीर करण्यात आला आहे.
तसेच जिल्ह्यातील इतर सेवाभावी संस्था आणि दुर्गा देवी मंडळांनीही अशाच प्रकारे उत्सवावरील खर्च टाळून दुष्काळग्रस्त शेतकऱ्यांच्या मदतीसाठी पुढे यावे, असे आवाहन युवा फ्रेंड्स असोसिएशन व श्रीराम बाल गणेश मंडळाच्या वतीने करण्यात आले आहे.
