मानोरा : लेह-लडाख येथे झालेल्या भीषण अपघातात मृत्यू झालेल्या रिसोड येथील युवा वकील ॲड. कुणाल चोपडे (वय 24) यांच्या अंत्यविधीस उपस्थित राहून परत येत असलेल्या चार जणांच्या कारचा बुधवारी (15 जुलै) पहाटे मानोरा शहराजवळ भीषण अपघात झाला. या अपघातात कारमधील चारही जण गंभीर जखमी झाले आहेत.
मिळालेल्या माहितीनुसार, दिग्रस येथील दीपक फिरके यांच्यासह इतर तिघेजण रविवारी रिसोड येथे ॲड. कुणाल चोपडे यांच्या अंत्यविधीस उपस्थित राहण्यासाठी गेले होते. अंत्यविधी आटोपल्यानंतर ते MH-29 V-1919 क्रमांकाच्या कारने दिग्रसकडे परत निघाले होते.
बुधवारी पहाटे सुमारे 3.30 वाजताच्या सुमारास मानोरा शहरातील सृष्टी गार्डनसमोर चालकाचे वाहनावरील नियंत्रण सुटल्याने कारने रस्त्यावरील डिव्हायडरला जोरदार धडक दिली. धडक इतकी भीषण होती की कारचे मोठे नुकसान झाले असून वाहनातील चारही जण जखमी झाले.
अपघाताची माहिती मिळताच मानोरा येथील शिवसेना तालुकाप्रमुख रवींद्र पवार यांनी तातडीने घटनास्थळी धाव घेतली. स्थानिक नागरिकांच्या मदतीने जखमींना तत्काळ बाहेर काढून मानोरा ग्रामीण रुग्णालयात दाखल करण्यात आले. तेथे वैद्यकीय अधिकाऱ्यांनी प्राथमिक उपचार केल्यानंतर पुढील उपचारासाठी सर्व जखमींना दिग्रस येथील रुग्णालयात रेफर करण्यात आले.
अंत्यविधी आटपून परतत असताना झालेल्या या अपघातामुळे परिसरात हळहळ व्यक्त होत आहे. अपघाताचे नेमके कारण अद्याप स्पष्ट झालेले नसून मानोरा पोलिसांनी घटनास्थळाचा पंचनामा करून पुढील तपास सुरू केला आहे.
