हिंगोली (DAP Fertilizer) : खरीप हंगामाच्या पार्श्वभूमीवर जिल्ह्यात डीएपी खताची उपलब्धता सुनिश्चित करण्यासाठी कळमनुरीचे आमदार संतोष बांगर आणि हिंगोलीचे आमदार तानाजीराव मुटकुळे यांनी २६ जून रोजी जिल्हाधिकारी राहुल गुप्ता यांच्यासोबत चर्चा केली.
यावेळी जिल्ह्यात डीएपी खताचा पुरेसा पुरवठा करून शेतकऱ्यांना वेळेत खत उपलब्ध करून देण्याच्या सूचना जिल्हाधिकाऱ्यांना करण्यात आल्या.
यानंतर आमदार तानाजीराव मुटकुळे यांनी सांगितले की, राज्य शासनाकडे सुमारे ४०० मेट्रिक टन डीएपी खताचा साठा उपलब्ध असून, त्यापैकी २०० मेट्रिक टन साठा आज किंवा उद्या हिंगोली जिल्ह्यात दाखल होणार आहे. उर्वरित साठाही लवकरच उपलब्ध करून दिला जाईल.
आमदार मुटकुळे यांनी जिल्ह्यातील सर्व खत विक्रेते व व्यापाऱ्यांना उपलब्ध होणारा डीएपी खतसाठा कोणताही विलंब न करता तातडीने शेतकऱ्यांना विक्री करण्याचे आवाहन केले. पेरणीच्या हंगामात शेतकऱ्यांना खताचा तुटवडा भासू नये, यासाठी प्रशासनाशी सातत्याने पाठपुरावा सुरू असून आवश्यक त्या सर्व उपाययोजना करण्यात येत असल्याचेही त्यांनी स्पष्ट केले.
