भरधाव पिक-अपची दुचाकीला जबर धडक, पती-पत्नीसह मुलगा ठार

वाशिम (Washim Accident) : भरधाव वेगाने येणाऱ्या पीकअप वाहनाने मोटारसायकलला धडक दिल्याने मोटारसायकलवरील तीन जण जागीच ठार झाल्याची दुर्दैवी घटना २३ एप्रिल रोजी सायंकाळी सुमारे ६ वाजता वाशिम–मंगरुळपीर रोडवरील पार्डी टकमोर फाट्यावर घडली. अपघाताची तीव्रता इतकी भीषण होती की मोटारसायकलचा अक्षरशः चुराडा झाला.

प्राप्त माहितीनुसार, वाशिम तालुक्यातील वारा जहागीर येथील रहिवासी संतोष लांभाडे (वय ४०), त्यांची पत्नी कलावतीबाई लांभाडे (वय ३५) आणि मुलगा ईश्वर लांभाडे (वय १२) हे तिघे वारा येथून पार्डी टकमोर येथे नातेवाईकांकडे आले होते. तेथून परत वारा येथे जात असताना पार्डी टकमोर फाट्यावर चौफुलीवरून समोर जात असताना मंगरुळपीरकडून येणारे पीकअप वाहन संतोष लांभाडे यांना दिसले नाही. परिणामी पीकअपने मोटारसायकलला जोरदार धडक दिली.

या भीषण अपघातात संतोष लांभाडे, कलावतीबाई लांभाडे आणि त्यांचा मुलगा ईश्वर लांभाडे हे तिघेही जागीच ठार झाले. धडक दिल्यानंतर पीकअप वाहनाचा चालक वाहन सुसाट वेगाने वाशिमकडे घेऊन पसार झाला.

अपघाताचा मोठा आवाज ऐकून पार्डी टकमोर येथील नागरिकांनी घटनास्थळी धाव घेतली. मात्र तेव्हा तिघांचाही मृत्यू झाल्याचे स्पष्ट झाले. या घटनेची माहिती वारा जहागीर येथे पोहोचताच गावात शोककळा पसरली. या प्रकरणाची नोंद ग्रामीण पोलीस ठाण्यात करण्यात आली असून पुढील तपास सुरू आहे.