परभणीत मृत्यूनंतर शेतात अस्थी विसर्जन करत लावले आंब्याचे झाड!

परभणी (Shetkari Bones Immersed) : पाथरी तालुक्यातील बाबुलतार येथील ज्येष्ठ वारकरी रमभाऊ थिटे उर्फ राम बाबा यांच्या निधनानंतर त्यांच्या कुटुंबीयांनी पारंपरिक रूढी परंपरे ऐवजी पालकांची जिवंतपणी सेवा, पर्यावरण संवर्धन आणि वारकरी परंपरेचे जतन करा हा समाजाला प्रेरणा देणारा आदर्श उपक्रम राबविल्याने परिसरात आता  त्याची चर्चा होत आहे.  

रामभाऊ थिटे यांचे शनिवार २३ मे  रोजी निधन झाले होते. त्यानंतर २४ मे रोजी त्यांच्या इच्छेनुसार शेतामध्ये वारकरी परंपरेत अंत्यसंस्कार करण्यात आले. टाळ मृदंगाच्या गजरात विठ्ठलाचे नामस्मरण करत अंत्ययात्रा काढण्यात आली. वारकरी संप्रदायाच्या उपस्थितीत भक्तिमय वातावरणात त्यांच्या पार्थिवाला अग्नी (Shetkari Bones Immersed) देण्यात आला. राम बाबा यांच्या आजारपणात त्यांचा मुलगा दशरथ थिटे यांनी घरामध्येच आयसीयू बेड व वैद्यकीय सुविधायुक्त खोली तयार करून शेवटपर्यंत वडिलांची सेवा केली. वृद्ध पालकांची जबाबदारी स्वीकारून त्यांना आवश्यक उपचार व काळजी देण्याचा संदेश त्यांच्या कृतीतून दिसून आला.

राम बाबा यांनी आपल्या अस्थी गंगेत विसर्जित (Shetkari Bones Immersed) न करता स्वतःच्या शेतात विसर्जित करण्याची इच्छा व्यक्त केली होती. त्यानुसार  सोमवार २५ मे रोजी कुटुंबीयांच्या हस्ते राख सावडण्याचा विधी करण्यात आला. त्यावेळी शेतामध्ये आंब्याचे झाड लावून त्याच ठिकाणी अस्थी व रक्षा विसर्जित करण्यात आली. धार्मिक विधींमधूनही पर्यावरण संवर्धनाचा विचार समाजापुढे ठेवण्याचा प्रयत्न या माध्यमातून करण्यात आला.

दशरथ थिटे यांनी यावेळी बोलताना, आई-वडील जिवंत असताना त्यांची सेवा करणे हेच खरे कर्तव्य आहे. त्यांच्या आजारपणात दुर्लक्ष करून निधनानंतर मोठे कार्यक्रम करण्यापेक्षा तो खर्च त्यांच्या उपचारांवर आणि सेवेसाठी करावा, अशी भावना व्यक्त केली. त्याच भूमिकेतून त्यांनी वडिलांचे दिवस व तेरावे न घालण्याचा निर्णय घेतल्याचे सांगितले.