विरार परिसरात एक अत्यंत धक्कादायक आणि भीषण घटना उघडकीस आली असून, प्रियकराने प्रेयसीसह तिच्या आईची निर्घृण हत्या केल्याने खळबळ उडाली आहे.
मुंबई (Virar Crime) : विरार परिसरात एक अत्यंत धक्कादायक आणि भीषण घटना उघडकीस आली असून, प्रियकराने प्रेयसीसह तिच्या आईची निर्घृण हत्या केल्याने खळबळ उडाली आहे. त्यानंतर आरोपीने स्वतःचे जीवन संपवण्याचाही प्रयत्न केल्याची माहिती समोर आली आहे. लग्नाच्या प्रस्तावाला नकार मिळाल्याच्या रागातून हा प्रकार घडल्याचे सांगितले जात आहे.
मृतांमध्ये नॅन्सी मिश्रा (वय २४) आणि तिची आई सरिता मिश्रा (वय ४५) यांचा समावेश असून, शिवम उपाध्याय असे आरोपीचे नाव आहे.
ही घटना आज, बुधवार (२९ एप्रिल) रोजी दुपारी सुमारे १२.३० वाजण्याच्या सुमारास विरार पश्चिम येथील पूणम आकांक्षा इमारत, न्यू विवा कॉलेजजवळ घडली.
मिळालेल्या माहितीनुसार, शिवम आणि नॅन्सी यांच्यात मागील दोन वर्षांपासून प्रेमसंबंध होते. मंगळवारी रात्री शिवम आपल्या नातेवाईकांसह मिश्रा कुटुंबाच्या घरी लग्नाचा प्रस्ताव घेऊन गेला होता. मात्र, नॅन्सी आणि तिची आई सरिता यांनी हा प्रस्ताव नाकारला.
या नकारामुळे संतप्त झालेल्या शिवमने बुधवारी पुन्हा त्या घरात प्रवेश केला. त्याने सोबत आणलेल्या धारदार शस्त्राने नॅन्सी आणि तिच्या आईवर हल्ला चढवला. या हल्ल्यात दोघींचाही जागीच मृत्यू झाला.
यानंतर आरोपीने स्वतःलाही ब्लेडने जखमी करून आत्महत्येचा प्रयत्न केला. दरम्यान, घरातून आरडाओरडा ऐकून शेजाऱ्यांनी घटनास्थळी धाव घेतली. त्यांनी घरात दोघींचे रक्ताच्या थारोळ्यात पडलेले मृतदेह आणि जखमी अवस्थेतील आरोपी पाहून तातडीने पोलिसांना माहिती दिली.
बोलिंज पोलीस ठाणे येथील पोलिसांनी घटनास्थळी पोहोचून परिस्थिती ताब्यात घेतली. जखमी आरोपीला तातडीने रुग्णालयात दाखल करण्यात आले असून त्याच्यावर उपचार सुरू आहेत.
या प्रकरणी पोलिसांनी दुहेरी हत्येचा गुन्हा दाखल केला असून पुढील तपास सुरू आहे. या घटनेमुळे विरार परिसरात भीती आणि संतापाचे वातावरण निर्माण झाले आहे.