राष्ट्रवादी काँग्रेसच्या महिला प्रदेशाध्यक्षपदाची धुरा आता वैशाली नागवडे यांच्या खांद्यावर सोपवण्यात आली आहे.
मुंबईतील कार्यक्रमात सुनेत्रा पवार यांच्या हस्ते नियुक्तीपत्र प्रदान; अजित पवारांच्या विश्वासू नेत्या म्हणून वैशाली नागवडे यांची ओळख
राष्ट्रवादी काँग्रेसच्या महिला प्रदेशाध्यक्षपदाची धुरा आता वैशाली नागवडे यांच्या खांद्यावर सोपवण्यात आली आहे. अशोक खरात प्रकरणानंतर रुपाली चाकणकर यांच्या गच्छंतीमुळे रिक्त झालेल्या या पदासाठी नागवडे यांची निवड करण्यात आली. मुंबई येथे आयोजित कार्यक्रमात पक्षाच्या अध्यक्षा सुनेत्रा पवार यांनी त्यांना अधिकृत नियुक्तीपत्र प्रदान केले. या नियुक्तीमुळे राष्ट्रवादीच्या महिला आघाडीत नव्या नेतृत्वाची सुरुवात झाल्याची चर्चा सुरू आहे.
दौंडच्या रहिवासी असलेल्या वैशाली नागवडे या अनेक वर्षांपासून राष्ट्रवादी काँग्रेसमध्ये सक्रिय आहेत. विशेषतः पुणे ग्रामीण भागात महिला संघटन मजबूत करण्यासाठी त्यांनी सातत्याने काम केले असून, महिला कार्यकर्त्यांचे व्यापक जाळे उभारण्यात त्यांचे महत्त्वपूर्ण योगदान राहिले आहे.
संघटनात्मक कामगिरीची दखल घेत उपमुख्यमंत्री अजित पवार यांनी यापूर्वी नागवडे यांच्यावर 'महानंदा दूध'च्या अध्यक्षपदाची जबाबदारी सोपवली होती. पक्षात त्या अजित पवार यांच्या विश्वासू आणि तळागाळातील नेतृत्व म्हणून ओळखल्या जातात.
रुपाली चाकणकर यांच्याविरोधात विविध प्रसंगी आक्रमक भूमिका घेतल्यामुळे वैशाली नागवडे या यापूर्वीही राजकीय चर्चेच्या केंद्रस्थानी राहिल्या होत्या. आता चाकणकर यांच्या जागीच त्यांची महिला प्रदेशाध्यक्ष म्हणून नियुक्ती झाल्याने आगामी काळात राष्ट्रवादीच्या महिला आघाडीच्या नेतृत्वात अधिक आक्रमकता आणि संघटनात्मक बळ दिसून येईल, अशी चर्चा राजकीय वर्तुळात सुरू आहे.
दरम्यान, वैशाली नागवडे यांच्या नियुक्तीचे पक्षातील पदाधिकारी, कार्यकर्ते आणि समर्थकांनी स्वागत केले आहे. त्यांच्या नेतृत्वाखाली महिला आघाडी अधिक प्रभावीपणे कार्य करेल, असा विश्वासही पक्षातील विविध स्तरांतून व्यक्त केला जात आहे.