27 जूनला शिवसेना पक्षप्रमुख उद्धव ठाकरे हिंगोलीत

हिंगोली (Uddhav Thackeray) : शिवसेना पक्षप्रमुख उद्धव ठाकरे यांच्या महाराष्ट्रव्यापी दौऱ्याला शुक्रवार, 26 जून 2026 पासून सुरुवात होत आहे. ‘ऑपरेशन टायगर’च्या पार्श्वभूमीवर हा दौरा राजकीयदृष्ट्या अत्यंत महत्त्वाचा मानला जात आहे. ज्या ज्या लोकसभा मतदारसंघात शिवसेना (उद्धव बाळासाहेब ठाकरे) पक्षाच्या खासदारांनी बंडखोरी केली आहे, त्या सहा लोकसभा मतदारसंघांना उद्धव ठाकरे स्वतः भेटी देणार आहेत. याच पार्श्वभूमीवर हिंगोली लोकसभा मतदारसंघाचे खासदार नागेश पाटील आष्टीकर यांनी बंड पुकारल्याने उद्धव ठाकरे येत्या शनिवारी, 27 जून रोजी हिंगोलीत दाखल होत आहेत.

उद्धव ठाकरे (Uddhav Thackeray) यांच्या दौऱ्याची सुरुवात शुक्रवारी सायंकाळी मुंबईहून नागपूर विमानाने होणार असून त्यानंतर वाहनाने ते यवतमाळ येथे मुक्कामी पोहोचतील. शनिवार, 27 जून रोजी सकाळी 10.30 वाजता यवतमाळ, दुपारी 2.00 वाजता वाशिम येथे कार्यक्रम घेतल्यानंतर सायंकाळी 4.00 वाजता ते हिंगोलीत दाखल होतील. हिंगोलीतील कार्यक्रमास आमदार अंबादास दानवे, संपर्कप्रमुख बबनराव थोरात, जिल्हाप्रमुख संदेश देशमुख, अजय पाटील आदी पदाधिकारी उपस्थित राहणार आहेत. हिंगोलीतील कार्यक्रमानंतर रात्री 8.00 वाजता ते परभणीकडे मुक्कामासाठी रवाना होतील.

हिंगोलीचे खासदार नागेश पाटील आष्टीकर यांनी ‘ऑपरेशन टायगर’मध्ये बंडखोरी केल्यानंतर मतदारसंघातील शिवसैनिकांमध्ये संभ्रमाचे वातावरण निर्माण झाले होते. या पार्श्वभूमीवर उद्धव ठाकरे स्वतः हिंगोलीत येऊन शिवसैनिकांशी थेट संवाद साधणार असल्याने कार्यकर्त्यांमध्ये उत्साह संचारला आहे. या दौऱ्यातून उद्धव ठाकरे (Uddhav Thackeray) बंडखोरांना थेट आव्हान देणार असून, निष्ठावंत शिवसैनिकांना बळ देण्याचा त्यांचा प्रयत्न आहे.