वसमत तालुक्यातील अकोली शिवारात ट्रॅक्टर कालव्यात पडल्याने एका तरुणाचा मृत्यू झाल्याची घटना रविवारी सकाळी घडली. ट्रॅक्टरचे हेड अंगावर पडल्याने त्याखाली दबून या तरुणाचा मृत्यू झाला आहे.
वसमत तालुक्यातील अकोली शिवारातील घटना
वसमत (Tractor Acciden) : वसमत तालुक्यातील अकोली शिवारात ट्रॅक्टर कालव्यात पडल्याने एका तरुणाचा मृत्यू झाल्याची घटना रविवारी सकाळी घडली. ट्रॅक्टरचे हेड अंगावर पडल्याने त्याखाली दबून या तरुणाचा मृत्यू झाला आहे.
वसमत तालुक्यातील अकोली येथील ज्ञानेश्वर उर्फ माऊली माधव कदम (वय १८ वर्ष) रविवारी सकाळी ट्रॅक्टर घेऊन घराकडे येत असताना अकोलीच्या कालव्याच्या रस्त्यावरून येताना ट्रॅक्टर ट्रॉलीसह कालव्यात कोसळला. या अपघातात ज्ञानेश्वर याच्या अंगावरच ट्रॅक्टरचे हेड पडल्यामुळे तो त्याखाली दबला गेला आणि त्यात त्याचा मृत्यू झाला.
परिसरातील शेतकऱ्यांनी ही घटना पाहताच तात्काळ मदतीला धाव घेतली. पोलिसांना पाचारण करण्यात आले. वसमत ग्रामीण पोलिस ठाण्याचे सहाय्यक पोलिस निरीक्षक गजानन बोराटे आणि त्यांच्या सहकाऱ्यांनी घटनास्थळी भेट देऊन क्रेनच्या मदतीने ट्रॅक्टर बाहेर काढले व त्याखाली दबलेला ज्ञानेश्वर याचा मृतदेह बाहेर काढण्यात आला.
अल्पभूधारक शेतकऱ्याचा तरुण मुलगा अपघातात दगावल्याने मोठी शोककळा पसरली आहे. तो एकुलता एक मुलगा असल्याने कुटुंबावर तसेच गावावर दुःखाचा डोंगर कोसळला आहे. पंचनामा व इतर सोपस्कार करून पुढील कारवाई पोलिसांकडून सुरू आहे.