आखाडा बाळापूर (Teen Suicide) : कुटुंबाने महागडा मोबाईल खरेदी केल्याबद्दल नाराजी व्यक्त केल्याच्या पार्श्वभूमीवर १६ वर्षीय शिवम गोविंद शिंदे याने राहत्या घरी गळफास घेत आत्महत्या केल्याची दुर्दैवी घटना घडली. एकुलता एक मुलगा गमावल्याने शिंदे कुटुंबावर दुःखाचा डोंगर कोसळला असून बिबथर गावात हळहळ व्यक्त होत आहे.
मिळालेल्या माहितीनुसार, गोविंद शिंदे यांचा मुलगा शिवम हिंगोली येथे शिक्षण घेत होता. सुट्ट्यांमुळे तो बिबथर येथे आला होता. शुक्रवारी (ता. १५) वडिलांनी मोबाईल खरेदीसाठी पैसे दिल्यानंतर शिवमने आखाडा बाळापूर येथून मोबाईल खरेदी केला.
सायंकाळी सुमारे ५ वाजता घरी परतल्यानंतर “इतका महागडा मोबाईल कशाला घेतलास?” असा प्रश्न कुटुंबीयांनी विचारला. या किरकोळ वादातून रागाच्या भरात शिवमने घरातील एका खोलीत जाऊन गळफास घेतला.
बराच वेळ दरवाजा न उघडल्याने कुटुंबीयांनी दरवाजा तोडला असता शिवम गळफास घेतलेल्या अवस्थेत आढळला. त्याला तातडीने आखाडा बाळापूर ग्रामीण रुग्णालयात नेण्यात आले; मात्र डॉक्टरांनी त्याला मृत घोषित केले.
घटनेची माहिती मिळताच पोलीस निरीक्षक विष्णुकांत गुठ्ठे, उपनिरीक्षक रोहिनकर, जमादार शेख अन्सार आणि शिवाजी पवार यांनी ग्रामीण रुग्णालयात धाव घेऊन पाहणी केली. शनिवारी (ता. १६) सकाळी मृतदेहाचे शवविच्छेदन करण्यात आले. या प्रकरणी आखाडा बाळापूर पोलीस ठाण्यात अद्याप गुन्हा नोंदविण्याची प्रक्रिया सुरू आहे.
शिंदे कुटुंब शेतीवर उदरनिर्वाह करते. शिवमला दोन बहिणी असून एकुलत्या एक मुलाच्या निधनामुळे कुटुंबावर दुःखाचा डोंगर कोसळला आहे. गावात सर्वत्र हळहळ व्यक्त होत आहे.
