परभणीतील गंगाखेड उपविभाग मराठवाड्यात अव्वल; एसआयआर अंतर्गत ७०.२९ टक्के संगणकीकरण पूर्ण

परभणीतील गंगाखेड उपविभाग मराठवाड्यात अव्वल; एसआयआर अंतर्गत ७०.२९ टक्के संगणकीकरण पूर्ण

भारत निवडणूक आयोगाच्या मतदार यादी विशेष सखोल पुनरिक्षण (SIR) कार्यक्रमांतर्गत परभणी जिल्ह्यातील गंगाखेड उपविभागाने संगणकीकरणाच्या कामात उल्लेखनीय यश मिळवत मराठवाड्यातील सर्व उपविभागांमध्ये प्रथम क्रमांक पटकावला आहे. शनिवार, १८ जुलै रोजी सकाळी ८ वाजेपर्यंत उपविभागाने ७०.२९ टक्के संगणकीकरण (डिजिटायझेशन) पूर्ण केले.

राज्यभर सुरू असलेल्या एसआयआर अभियानात गंगाखेड उपविभागाने नियोजनबद्ध कार्यपद्धती, प्रभावी समन्वय आणि क्षेत्रीय यंत्रणेच्या सातत्यपूर्ण प्रयत्नांच्या जोरावर ही कामगिरी साध्य केली आहे. उपविभागीय अधिकारी तथा मतदार नोंदणी अधिकारी जिवराज डापकर, तहसीलदार तथा सहाय्यक मतदार नोंदणी अधिकारी उषाकिरण श्रुंगारे, नायब तहसीलदार अशोकराव केंद्रे, नगर परिषदेचे मुख्याधिकारी जयवंत सोनवणे, गटविकास अधिकारी अक्षय सुक्रे, गटशिक्षणाधिकारी शशिकांत मुंढे, तालुका कृषी अधिकारी मारोती शेंडगे, उपअभियंता अरविंद बामणीकर, सहाय्यक गटविकास अधिकारी जयराम मोडके तसेच पालम व पूर्णा तहसीलदार यांच्या मार्गदर्शनाखाली हे काम पार पडले.

गंगाखेड विधानसभा मतदारसंघातील ४३२ मतदान केंद्र भागांमध्ये प्रशिक्षित बीएलओ (BLO) अधिकाऱ्यांनी एकूण ४,१७,४८१ मतदारांपैकी ४,१२,८८८ (९८.९० टक्के) मतदारांना फॉर्मचे वितरण केले आहे. यापैकी २,९३,४४४ मतदारांचे (७०.२९ टक्के) संगणकीकरण पूर्ण करण्यात आले असून, या कामगिरीमुळे गंगाखेड उपविभाग मराठवाड्यात तसेच उपविभागीय स्तरावर अव्वल ठरला आहे.

जिल्हा प्रशासनाने केली प्रशंसा

मतदार यादी विशेष सखोल पुनरिक्षण मोहिमेत उपविभागीय अधिकारी तथा मतदार नोंदणी अधिकारी जिवराज डापकर यांच्या प्रभावी नेतृत्व, सातत्यपूर्ण आढावा, काटेकोर नियोजन आणि क्षेत्रीय अधिकाऱ्यांशी समन्वयामुळे ही उल्लेखनीय कामगिरी शक्य झाल्याचे जिल्हा प्रशासनाने नमूद केले आहे.

त्यांच्या मार्गदर्शनाखाली गंगाखेड, पालम व पूर्णा येथील तहसीलदार, मंडळ अधिकारी, तलाठी, मतदान केंद्र स्तरीय अधिकारी (BLO) आणि संबंधित कर्मचाऱ्यांनी अत्यंत वेगाने व अचूकतेने संगणकीकरणाची प्रक्रिया पूर्ण केली. या उल्लेखनीय कार्याबद्दल जिल्हा प्रशासनाने सर्व अधिकारी व कर्मचाऱ्यांचे अभिनंदन करत उर्वरित कामही याच गतीने पूर्ण करण्याच्या सूचना दिल्या आहेत.

गंगाखेड तालुक्यात एसआयआर अभियानाला वेग

गंगाखेड तालुक्यातील तलाठी दररोज सकाळी ८ वाजता आपल्या सज्जातील गावांना भेट देत बीएलओंना ईएफ अर्ज भरणे, आवश्यक कागदपत्रे संकलित करणे, संगणकीकरण करणे तसेच प्रत्यक्ष येणाऱ्या अडचणी सोडविण्यासाठी मदत करत आहेत. तलाठी, बीएलओ आणि स्थानिक नागरिक यांच्या प्रभावी समन्वयामुळे एसआयआर अभियानाला अधिक गती मिळाली असून गंगाखेड तालुका उपविभाग सातत्याने प्रगतीपथावर असल्याचे दिसून येत आहे.