कोरची तालुक्यातील शिवनाथ नदी उगमस्थानाला 'क' श्रेणी पर्यटन स्थळ घोषित करा!

भाजयुमो चे तालुकाध्यक्ष विनोद कोरटी यांची मुख्यमंत्र्यांकडे मागणी

कोरची (Shivnath River) : गडचिरोली जिल्ह्यातील दुर्गम आणि नैसर्गिक सौंदर्याने नटलेल्या छत्तीसगड राज्यातील जीवनदायिनी असलेली कोरची तालुक्यातील कोटगुल-गोडरी गावाजवळून उगम पावलेल्या शिवनाथ नदीच्या उगमस्थानाला 'क' श्रेणी पर्यटन स्थळ म्हणून घोषित करण्यात यावे, अशी आग्रही मागणी भाजयुमो चे तालुकाध्यक्ष तथा युवा नेते विनोद कोरटी यांनी राज्याचे मुख्यमंत्री व पर्यटन मंत्र्यांकडे ई-मेल निवेदनाद्वारे केली आहे.निसर्गाच्या सान्निध्यात वसलेल्या या उगमस्थानी वर्षभर पर्यटकांना आकर्षित करण्याची मोठी क्षमता आहे. मात्र, योग्य नियोजनाअभावी हे विहंगम स्थळ उपेक्षित राहिले आहे. येथे जर 'क' श्रेणी पर्यटन स्थळांतर्गत विविध विकासकामे झाली, तर या परिसराचा कायापालट होऊ शकतो.

 शिवनाथ नदीचा उगम परिसर अतिशय शांत आणि निसर्गरम्य आहे. या जागेला पर्यटन स्थळाचा दर्जा मिळाल्यास येथे पर्यटकांच्या सोयीसाठी रस्ते, पिण्याचे पाणी, सुशोभीकरण, आणि निवाऱ्याची व्यवस्था करणे शक्य होईल. यामुळे स्थानिकांना रोजगाराच्या नवीन संधी उपलब्ध होऊन या परिसराचा आर्थिक व सामाजिक विकास होण्यास मदत होईल व स्थानिक पर्यटनाला चालना मिळेल.      

गडचिरोली जिल्ह्यातील कोरची तालुक्याला समृद्ध वनसंपदेचा वारसा लाभला आहे. शिवनाथ नदीच्या उगमस्थानाचा विकास झाल्यास गडचिरोलीसह लगतच्या परिसरातील पर्यटकांना एक उत्तम पिकनिक स्पॉट आणि निसर्ग पर्यटन केंद्र उपलब्ध होईल. या परिसराचे जतन करून त्यास अधिकृत पर्यटन स्थळ बनवावे, अशी मागणी स्थानिक नागरिकांकडूनही लावून धरण्यात आली आहे. शासनाकडून या मागणीवर सकारात्मक निर्णय घेऊन लवकरच निधी मंजूर होईल, अशी अपेक्षा भाजयुमो चे तालुकाध्यक्ष विनोद कोरटी यांनी व्यक्त केली आहे.