बुद्ध मूर्ती विटंबना प्रकरणी रिसोड शहर कडकडीत बंद; दोषींवर कठोर कारवाईची मागणी

रिसोड (Risod city closed) : मराठवाड्यातील वाढोणा परिसरातील बुद्ध टेकडीवरील तक्षशिला बुद्धविहार येथे तथागत गौतम बुद्ध यांच्या मूर्तीची अज्ञात समाजकंटकांनी विटंबना करून तोडफोड व जाळपोळ केल्याच्या घटनेच्या निषेधार्थ ५ मे रोजी रिसोड शहर कडकडीत बंद ठेवण्यात आला. १ मे रोजी ही घटना उघडकीस आल्यानंतर परिसरात खळबळ उडाली असून बौद्ध अनुयायी व सकल बहुजन समाजाच्या भावना दुखावल्या गेल्या.

या (Risod city closed) निषेधार्थ डॉ. बाबासाहेब आंबेडकर चौक ते तहसील कार्यालयापर्यंत शांततेत निषेध मोर्चा काढण्यात आला. यावेळी तहसीलदार प्रतीक्षा तेजनकर यांना निवेदन देण्यात आले. निवेदनात या घटनेला समाजाच्या अस्मितेवर झालेला आघात असल्याचे नमूद करून आरोपींची तात्काळ अटक व कठोर शिक्षा करण्याची मागणी करण्यात आली. मोर्चात महिला, युवकांसह मोठ्या संख्येने नागरिक सहभागी झाले होते. कोणताही अनुचित प्रकार घडू नये यासाठी ठाणेदार रामेश्वर चव्हाण यांच्या मार्गदर्शनाखाली राज्य राखीव दल व पोलीस प्रशासनाकडून कडक बंदोबस्त ठेवण्यात आला होता. दरम्यान, निषेध मोर्चा पूर्णतः शांततेत पार पडला असून शहरात कायदा व सुव्यवस्था अबाधित राहिली.