तब्बल 25 वर्षानंतर जिल्हा बँकेची निवडणूक

रिसोड (District Bank Election) : गेल्या 25 वर्षांपासून बिनविरोध होणाऱ्या अकोला-वाशिम जिल्हा मध्यवर्ती सहकारी बँकेच्या निवडणुकीने यंदा खऱ्या अर्थाने राजकीय वळण घेतले आहे. रिसोड येथील ३०/१ अ, प्राथमिक कृषी सहकारी पतपुरवठा /विकास सेवा सहकारी संस्था मतदार संघाच्या निवडणुकीत विद्यमान आमदार अमित झनक यांच्या मातोश्री शोभाताई सुभाषराव झनक आणि कृषी उत्पन्न बाजार समितीचे माजी सभापती गजानन पाचरणे यांचे सुपुत्र डॉ. विठ्ठल पाचरणे यांच्यात थेट लढत होत असल्याने जिल्ह्याचे राजकीय  सहकार क्षेत्रात वातावरण तापले आहे.

गेली अनेक दशके या बँकेवर झनक कुटुंबाचे निर्विवाद वर्चस्व राहिले आहे, परंतु यंदा पहिल्यांदाच हे वर्चस्व निवडणुकीच्या मैदानात कसोटीला लागले आहे. विशेष म्हणजे, बाजार समितीचे माजी सभापती गजानन पाचरणे हे दरवेळी आपला उमेदवारी अर्ज दाखल करत, परंतु ऐनवेळी काही कारणास्तव ते अर्ज मागे घेत असत. मात्र, यंदाची निवडणूक परिस्थिती पूर्णपणे वेगळी आहे. गजानन पाचरणे यांनी यावेळी माघार न घेता आपले सुपुत्र डॉ. विठ्ठल पाचरणे यांना रिंगणात उतरवले आहे. दुसरीकडे, झनक गटाने शोभाताई झनक यांच्या माध्यमातून आपली पकड कायम ठेवण्यासाठी कंबर कसली आहे. या एका जागेच्या निवडणुकीसाठी दोन्ही बाजूंकडून सर्वस्व पणाला लावले जात आहे.

या मतदारसंघावर आतापर्यंत झनक घराण्याचे वर्चस्व राहिले आहे. मात्र, 25 वर्षा नंतर यंदा प्रथमच त्यांना थेट निवडणुकीला सामोरे जावे लागत असल्याने राजकीय रंगत वाढली आहे. दुसरीकडे बाजार समितीचे माजी सभापती गजाननराव पाचरणे यांनी ही निवडणूक प्रतिष्ठेची करत आपल्या पुत्राला रिंगणात उतरवले आहे. दरम्यान,  माजी मंत्री अनंतराव देशमुख, आमदार भावना गवळी,  तसेच जिल्हा बँकेचे माजी उपाध्यक्ष वामनराव देशमुख यांनी पाचरणे यांची बाजू लावून धरल्याने या निवडणुकीत चांगलीच चुरस निर्माण झाल्याचे दिसून येते. जिल्हा बँकेच्या संचालक पदासाठी 25 वर्षा नंतर निवडणूक होत असल्याने मतदारांना  अन्यय साधारण महत्त्व प्राप्त झाले 
 आहे