हिंगोली येथील कन्या प्रियंका गोपालदास बगडिया यांना कर्करोग विषयात पीएच.डी. पदवी

हिंगोली (Priyanka Gopaldas Bagdia) : हिंगोलीच्या सुपुत्री कु. प्रियंका गोपालदास बगडिया यांनी कर्करोग संशोधनात लाईफ सायन्स विषयात पीएच.डी. पदवी संपादन करून हिंगोली जिल्ह्याच्या शिरपेचात मानाचा तुरा खोवला आहे. त्यांच्या या उल्लेखनीय यशाबद्दल सर्व स्तरातून त्यांचे हार्दिक अभिनंदन होत आहे. 

प्रियंका बगडिया (Priyanka Gopaldas Bagdia) यांचा शैक्षणिक प्रवास अत्यंत उज्ज्वल राहिला आहे. इयत्ता नववीपर्यंत त्यांनी सरजूदेवी स्कूल, हिंगोली येथे शिक्षण घेतले. पुढे इयत्ता नववी व दहावीसाठी नवोदय विद्यालयात प्रवेश घेतला आणि तिथूनच त्यांच्या यशाची घोडदौड सुरू झाली. महाविद्यालयीन शिक्षण यशवंत महाविद्यालय, नांदेड येथे पूर्ण केले. त्यानंतर न्यू मॉडेल डिग्री कॉलेज, हिंगोली येथून पदवी आणि स्वामी रामानंद तीर्थ मराठवाडा विद्यापीठ, नांदेड येथून पदव्युत्तर शिक्षण पूर्ण केले. विशेष म्हणजे शिक्षणाच्या प्रत्येक टप्प्यावर त्या कायम टॉपर राहिल्या आहेत.

आपल्या संशोधन प्रवासात त्यांनी नवोदय मेरिटोरियस, INSPIRE Scholarship, CSIR-NET (SPMF), MH-SET, GATE, DBT-NET आणि PET या प्रतिष्ठित परीक्षा उच्च श्रेणीत उत्तीर्ण केल्या आहेत. भाभा अणुसंशोधन केंद्र (BARC) आणि टाटा मेमोरियल सेंटर - ACTREC येथेही त्यांनी पात्रता मिळवली आहे.

प्रियंका (Priyanka Gopaldas Bagdia) यांचा संशोधन पेपर प्रतिष्ठित आंतरराष्ट्रीय जर्नल FASEB मध्ये प्रकाशित झाला असून त्यांच्या संशोधन कार्याला जर्नलच्या कव्हर पेजवर स्थान मिळाले, ही हिंगोलीसह संपूर्ण महाराष्ट्रासाठी अभिमानाची बाब आहे. अनेक राष्ट्रीय व आंतरराष्ट्रीय वैज्ञानिक सेमिनारमध्ये त्यांनी सक्रिय सहभाग नोंदवून पुरस्कार पटकावले आहेत. त्यांना 'आविष्कार' पुरस्कारानेही सन्मानित करण्यात आले आहे. 

कर्करोगासारख्या गंभीर विषयावर संशोधन करून समाजासाठी मोलाचे योगदान देणाऱ्या प्रियंका बगडिया (Priyanka Gopaldas Bagdia) यांचे हे यश त्यांच्या कुटुंबासह हिंगोली जिल्ह्यासाठी अत्यंत गौरवास्पद आहे. त्यांच्या उज्ज्वल भविष्यासाठी हार्दिक शुभेच्छा.