PMC मुख्यालयात बॉम्ब धमकीचा ई-मेल; संपूर्ण इमारत रिकामी करून तपास सुरू

पुणे (PMC Bomb Threat) : पुणे महानगरपालिका (PMC) मुख्यालयातील महापौर कार्यालयात बॉम्बस्फोटाची धमकी देणारा ई-मेल बुधवारी प्राप्त झाल्याने प्रशासनात खळबळ उडाली. या धमकीनंतर संपूर्ण इमारत रिकामी करण्यात आली असून परिसरात सखोल तपासणी सुरू करण्यात आली आहे, अशी माहिती अधिकाऱ्यांनी दिली.

या ई-मेलमध्ये मुंबईतील विधानभवन, तसेच नागपूरमधील राष्ट्रीय स्वयंसेवक संघ (RSS) मुख्यालयावरही बॉम्बस्फोट घडवण्याची धमकी देण्यात आली आहे. मात्र महाराष्ट्रातील विधानभवन इमारती मुंबई आणि नागपूर येथे असल्याने धमकी नेमकी कोणत्या ठिकाणासाठी आहे, हे स्पष्ट झालेले नाही.

धमकी मिळताच पुणे महानगरपालिकेच्या प्रशासनाने खबरदारी म्हणून मुख्य इमारत पूर्णपणे रिकामी केली आणि बॉम्ब शोध व नाशक पथकाच्या (BDDS) मदतीने तपासणी मोहीम सुरू केली.

माहितीनुसार, स्वतःला “Khalistan National Army” असे संबोधणाऱ्या गटाकडून हा ई-मेल पाठवण्यात आला आहे. या ई-मेलमध्ये पुणे महानगरपालिकेच्या महापौर कार्यालयात दुपारी 1.11 वाजता, विधानभवनावर दुपारी 3.11 वाजता आणि नागपूरमधील RSS मुख्यालयावर त्याच वेळी स्फोट घडवण्याची धमकी देण्यात आली आहे.

ई-मेलमध्ये 1984 मधील ‘ऑपरेशन ब्लू स्टार’ आणि ‘ऑपरेशन वुडरोज’ संदर्भात उल्लेख करून आरएसएसने त्याला पाठिंबा दिल्याचा आरोप करण्यात आला आहे. तसेच “बदला” आणि “BJP व RSS चा अंत” अशी धमकीवजा भाषा वापरण्यात आली असल्याचे अधिकाऱ्यांनी सांगितले.

महानगरपालिकेच्या एका अधिकाऱ्याने सांगितले की, “मुख्य इमारत आणि महापौर कार्यालयात आलेल्या ई-मेलमुळे संपूर्ण इमारत रिकामी करण्यात आली असून बॉम्ब शोध पथकाकडून सखोल तपासणी सुरू आहे.”

तपास पूर्ण होईपर्यंत आणि सुरक्षा यंत्रणांकडून इमारत सुरक्षित असल्याचे घोषित होईपर्यंत महानगरपालिका कार्यालय बंद ठेवण्यात येणार आहे. पुढील आदेशापर्यंत PMC परिसरात प्रवेश बंदी घालण्यात आली आहे.

शिवाजीनगर पोलीस ठाण्याचे निरीक्षक गिरीश दिघावकर यांनी सांगितले की, संशयास्पद वस्तूंच्या तपासणीसाठी शोधमोहीम सुरू असून धमकीच्या ई-मेलची सखोल चौकशी केली जात आहे. दरम्यान, परिसरात सुरक्षा वाढवण्यात आली आहे.