राज्यभरात अन्न व औषध प्रशासन विभागाच्या धडक कारवायांना वेग आला असून त्याचे पडसाद आता चंद्रपुरातही उमटू लागले आहेत.
मुंडेंच्या कारवाईचे चंद्रपुरातही पडसाद; व्यापारी वर्तुळात खळबळ
चंद्रपूर (Patanjali Store Raid) : राज्यभरात अन्न व औषध प्रशासन विभागाच्या धडक कारवायांना वेग आला असून त्याचे पडसाद आता चंद्रपुरातही उमटू लागले आहेत. शहरातील जटपुरा गेट परिसरातील पतंजली स्टोअरवर अन्न व औषध प्रशासन (FDA) विभागाने बुधवारी छापा टाकत ४५ हजार रुपयांहून अधिक किमतीचा औषधसाठा जप्त केला. या कारवाईमुळे व्यापारी वर्तुळात खळबळ उडाली असून संबंधित प्रकरणाचा तपास सुरू आहे.
राज्याच्या अन्न व औषध प्रशासन विभागाच्या आयुक्तपदी तुकाराम मुंडे यांनी सूत्रे स्वीकारल्यानंतर विभागाच्या कारवायांमध्ये लक्षणीय वाढ झाल्याचे पाहायला मिळत आहे. मंगळवारी शहरातील एका बेकरीवर कारवाई केल्यानंतर बुधवारी विभागाच्या पथकाने जटपुरा गेट परिसरातील पतंजली स्टोअरची सखोल तपासणी केली.
तपासणीदरम्यान काही नियमांचे उल्लंघन झाल्याचा संशय अधिकाऱ्यांना आला. त्यानंतर पथकाने दुकानातील सुमारे ४५ हजार रुपयांहून अधिक किमतीचा औषधसाठा जप्त केला. जप्त करण्यात आलेल्या औषधांचा प्रकार, त्यांची वैधता तसेच कारवाईमागील नेमकी कारणे याबाबत विभागाकडून अद्याप अधिकृत माहिती जाहीर करण्यात आलेली नाही.
सूत्रांच्या माहितीनुसार, अन्न व औषध प्रशासन विभागाकडून संबंधित कागदपत्रांची पडताळणी सुरू असून औषधसाठ्याची तपासणी आणि चौकशीची प्रक्रिया सुरू आहे. तपास पूर्ण झाल्यानंतरच पुढील कारवाईबाबत निर्णय घेतला जाणार असल्याचे सांगितले जात आहे.
या कारवाईमुळे शहरातील औषध विक्रेते आणि व्यावसायिकांमध्ये चर्चेला उधाण आले आहे. गेल्या काही दिवसांत अन्न व औषध प्रशासन विभागाने नियमांचे उल्लंघन करणाऱ्यांविरुद्ध कठोर भूमिका घेतल्याचे दिसून येत असून चंद्रपुरातील ही कारवाई त्याच मोहिमेचा भाग मानली जात आहे.
दरम्यान, या प्रकरणात चौकशीदरम्यान आणखी काही महत्त्वाची माहिती समोर येण्याची शक्यता वर्तवली जात आहे. त्यामुळे अन्न व औषध प्रशासन विभागाच्या पुढील अहवालाकडे व्यापारी आणि नागरिकांचे लक्ष लागले आहे.