परभणीत खड्डयात आदळून चाक निखळल्याने कार पलटी; चौघे जखमी

गंगाखेड शहरातील परळी नाक्यावरील घटना

परभणी (Parbhani car accident) : गंगाखेड शहरात खड्डयात आदळून एक्सलसहित चाक निखळल्याने कार पलटी होऊन झालेल्या अपघातात चौघे जखमी झाल्याची घटना बुधवार १० जून रोजी दुपारी झालेल्या अपघातात चौघे जखमी झाले असुन यातील एकाच्या डोक्यास गंभीर दुखापत झाल्याने त्यास परभणी येथे हलविण्यात आले आहे.

याबाबत समजलेली अधिक माहिती अशी की परभणीकडून गंगाखेड शहराच्या दिशेने येणारी कार क्रमांक एमएच ०२ बीझेड ७१२५ ही परळी नाका चौकात आल्यानंतर या चौकात परभणीच्या दिशेने असलेल्या खोलगट खड्डयात कार आदळून समोरील उजव्या बाजूचे चाक एक्सलसह निखळून पडल्यामुळे महाराणा प्रताप चौकाच्या कठड्यावर कार पलटी होऊन झालेल्या अपघातात शेख अशफाख शेख अफजल वय ४५ वर्ष, शेख मुश्ताक शेख अफजल वय ५५ वर्ष, शेख सलीमोद्दीन शेख बुऱ्हानोद्दीन वय ५० वर्ष व सय्यद नाजेम सय्यद अमीर अली वय ५३ वर्ष सर्व रा. परभणी हे चौघे जखमी झाले आहेत.

अपघाताची घटना घडताच या चौकात असलेल्या शेख मोसीन, किरण धापसे, सैफ चाऊस, बाबा खान, शेख असेफ आदींनी जखमींना तातडीने गंगाखेड उपजिल्हा रुग्णालयात दाखल केले. निवासी वैद्यकीय अधिकारी डॉ. गणेश वडजे, डॉ. मदिहा फईमोद्दीन काजी, परिचारिका मंजुषा राख, अश्विनी मुंडे, भारत भदर्गे, रशीद शहा आदींनी प्रथमोपचार केले. यातील शेख अशफाक यांच्या डोक्याला गंभीर मार लागल्याने पुढील उपचारासाठी त्यांना परभणी येथील रुग्णालयात हलविण्यात आले आहे. याप्रकरणी गंगाखेड पोलीस ठाण्यात गुन्हा दाखल झाला नव्हता.