रिसोडच्या मातीतील व्यक्तिमत्व राज्याचे मंत्री नामदार श्री. जयस्वालजी यांचे विशेष कार्य अधिकारी (OSD) डॉ. श्री. अनिल केशवरावजी देशमुख यांचा बुलढाणा अर्बन, रिसोड शाखा येथे सत्कार करण्यात आला.
मंत्रालयातील ओएसडी पदी नियुक्तीबद्दल व्यापारी महासंघ व मान्यवरांकडून कौतुक
रिसोड (OSD Appointment) : रिसोडच्या मातीतील कर्तृत्ववान व्यक्तिमत्व आणि राज्याचे मंत्री नामदार श्री. जयस्वालजी यांचे विशेष कार्य अधिकारी (OSD) डॉ. श्री. अनिल केशवरावजी देशमुख यांचा आज बुलढाणा अर्बन, रिसोड शाखा येथे स्नेहपूर्वक सत्कार करण्यात आला. मंत्रालयातील महत्त्वपूर्ण जबाबदारी स्वीकारल्यानंतर प्रथमच रिसोडमध्ये आगमन झाल्याने, या भूमिपुत्राचा गौरव करण्यासाठी विविध क्षेत्रांतील मान्यवर मोठ्या संख्येने उपस्थित होते.
या प्रसंगी व्यापारी महासंघाचे अध्यक्ष श्री. मदनसेठ बगडियाजी तसेच बुलढाणा अर्बनचे संचालक व व्यापारी महासंघाचे उपाध्यक्ष श्री. नंदकिशोरजी झंवर यांची प्रमुख उपस्थिती होती. मान्यवरांच्या हस्ते डॉ. अनिल देशमुख यांचा शाल, श्रीफळ आणि पुष्पगुच्छ देऊन यथोचित सन्मान करण्यात आला.
सत्काराला उत्तर देताना डॉ. अनिल देशमुख यांनी आपल्या भावना व्यक्त करताना सांगितले की, “आपल्या शहरात आणि आपल्या लोकांमध्ये होणारा सत्कार हा ऊर्जेचा स्रोत असतो. मंत्रालयातील पदाच्या माध्यमातून सर्वसामान्यांचे प्रश्न सोडवण्यास माझे नेहमीच प्राधान्य असेल.”
यावेळी श्री. मदनसेठ बगडियाजी आणि श्री. नंदकिशोरजी झंवर यांनी डॉ. देशमुख यांच्या कार्याचे कौतुक करत, एका स्थानिक सुपुत्राने मंत्रालयासारख्या महत्त्वाच्या ठिकाणी आपल्या कर्तृत्वाने स्थान निर्माण करणे ही संपूर्ण रिसोड शहरासाठी अभिमानाची बाब असल्याचे नमूद केले.
या सोहळ्याला बुलढाणा अर्बनचे पदाधिकारी, व्यापारी महासंघाचे सदस्य, शहरातील प्रतिष्ठित नागरिक तसेच डॉ. अनिल देशमुख यांचे स्नेही मोठ्या संख्येने उपस्थित होते. कार्यक्रमाचे नियोजन व आभार प्रदर्शन बुलढाणा अर्बन परिवाराच्या वतीने करण्यात आले.