पालिका प्रशासनाने दिलेल्या नोटीसची मुदत संपल्यानंतर संबंधित बांधकामाचे पाडकाम सुरू करण्यात आले.
बीड (NEET Paper Leak Case) : देशभरात खळबळ उडवून देणाऱ्या नीट पेपरफुटी प्रकरणातील कथित मास्टरमाईंड प्रा. पी. व्ही. कुलकर्णी यांच्याविरोधात कारवाईचा वेग वाढला असून, बीड शहरातील शाहूनगर परिसरात सुरू असलेल्या त्यांच्या चार मजली इमारतीच्या अनधिकृत बांधकामावर अखेर हातोडा पडला आहे. पालिका प्रशासनाने दिलेल्या नोटीसची मुदत संपल्यानंतर संबंधित बांधकामाचे पाडकाम सुरू करण्यात आले. NEET पेपरफुटी घोटाळ्याच्या तपासात केंद्रीय अन्वेषण विभागाने (CBI) महाराष्ट्रातील अनेक ठिकाणी धडक कारवाया केल्या आहेत. यामध्ये लातूरमधील आरसीसी क्लासेसचे प्रा. शिवराज मोटेगावकर आणि प्रा. पी. व्ही. कुलकर्णी यांना अटक करण्यात आली असून न्यायालयाने दोघांनाही 10 जूनपर्यंत न्यायालयीन कोठडी सुनावली आहे.
दरम्यान, बीडमधील शाहूनगर भागात कुलकर्णी यांच्या नावावर सुरू असलेल्या चार मजली इमारतीच्या बांधकामात अनियमितता आणि नियमभंग आढळल्याने नगरपालिका प्रशासनाने नोटीस बजावली होती. नोटीसनंतरही आवश्यक कार्यवाही न झाल्याने अखेर संबंधित ठेकेदाराकडूनच हे बांधकाम पाडण्याची प्रक्रिया सुरू करण्यात आली आहे.
22 लाख विद्यार्थ्यांच्या भवितव्याशी खेळ
देशभरातील सुमारे 22 लाख विद्यार्थ्यांच्या भवितव्याशी संबंधित असलेल्या नीट परीक्षेच्या पेपरफुटी प्रकरणामुळे मोठा संताप व्यक्त होत आहे. या घोटाळ्यात कुलकर्णी यांचे नाव समोर आल्यानंतर सिबीआय ने त्यांना अटक केली होती. त्यानंतर त्यांच्या आर्थिक व्यवहारांसह मालमत्तांचीही चौकशी सुरू करण्यात आली आहे.
‘प्लॅटिनम गोल्ड बॅच’चा तपास
CBI तपासात आणखी धक्कादायक बाबी समोर आल्या आहेत. लातूरमधील बालरोगतज्ज्ञ डॉ. मनोज शिरुरे यांच्या फ्लॅटवर प्रा. कुलकर्णी विशेष क्लासेस घेत असल्याची माहिती मिळाली आहे. तसेच मोटेगावकर क्लासेसमध्ये चालणाऱ्या ‘प्लॅटिनम गोल्ड बॅच’साठी विद्यार्थ्यांकडून लाखो रुपयांचे शुल्क आकारले जात असल्याचेही तपासात उघड झाले आहे. CBI सध्या कुलकर्णी, मोटेगावकर आणि डॉ. शिरुरे यांच्यातील कथित संबंध आणि आर्थिक व्यवहारांचा तपास करत आहे.
लातूर ते पुणे कनेक्शन
तपासादरम्यान कुलकर्णी यांचे पुण्यातील काही व्यक्तींशी संपर्क असल्याचेही समोर आले आहे. त्याच धाग्यावरून सिबीआय चे पथक लातूरपर्यंत पोहोचले आणि चौकशीअंती कुलकर्णी यांना ताब्यात घेण्यात आले. ते चार वर्षांपूर्वी सेवानिवृत्त झाले असून लातूरच्या कैलासनगर भागात राहत होते. त्यांचे कुटुंब सध्या पुण्यात वास्तव्यास असल्याची माहिती आहे. मूळ बीडचे रहिवासी असलेल्या कुलकर्णी यांनी शहरात उभारलेल्या चार मजली इमारतीवर आता प्रशासनाचा हातोडा पडल्याने नीट पेपरफुटी प्रकरणातील कारवाई आणखी तीव्र झाल्याचे चित्र आहे.