नाशिक शहरातील वाढत्या गुन्हेगारीच्या घटनांमध्ये आणखी एका धक्कादायक प्रकरणाची भर पडली आहे.
जळगावच्या तरुणीवर इंदिरानगरमध्ये चाकूने हल्ला; पहाटे जॉगिंग ट्रॅकवरील झाडाला संशयिताचा मृतदेह लटकलेल्या अवस्थेत सापडला
नाशिक : नाशिक शहरातील वाढत्या गुन्हेगारीच्या घटनांमध्ये आणखी एका धक्कादायक प्रकरणाची भर पडली आहे. इंदिरानगर पोलीस ठाण्याच्या हद्दीत शुक्रवारी रात्री एका तरुणीची धारदार शस्त्राने हत्या करण्यात आली. या घटनेनंतर अवघ्या काही तासांत शनिवारी पहाटे संशयित आरोपी तरुणाचा मृतदेह जॉगिंग ट्रॅक परिसरात आढळून आल्याने शहरात मोठी खळबळ उडाली आहे. प्राथमिक माहितीनुसार, एकतर्फी प्रेमातून ही घटना घडल्याचा संशय पोलिसांनी व्यक्त केला आहे.
पोलिसांनी दिलेल्या माहितीनुसार, मृत तरुणी वैष्णवी अनिल आवारे ही मूळची जळगाव जिल्ह्यातील अमळनेर तालुक्यातील रहिवासी होती. ती अवघ्या 15 दिवसांपूर्वी नाशिकमध्ये आली होती आणि इंदिरानगर परिसरातील वनसंपदा सोसायटीमध्ये पेईंग गेस्ट (PG) म्हणून राहत होती. तिच्या मागोमाग यवतमाळ येथील संशयित तरुणही नाशिकमध्ये आल्याची माहिती समोर आली आहे.
शुक्रवारी रात्री सुमारे 10.30 वाजण्याच्या सुमारास, वैष्णवी वनसंपदा सोसायटीच्या गार्डन परिसरातून जात असताना संशयिताने तिचा रस्ता अडवला. त्यानंतर धारदार चाकूने तिच्यावर वार करण्यात आले. गंभीर जखमी झालेल्या वैष्णवीचा घटनास्थळीच मृत्यू झाला. हल्ल्यानंतर आरोपी तेथून पसार झाला होता. घटनेची माहिती मिळताच इंदिरानगर पोलिसांनी घटनास्थळी धाव घेत तपास सुरू केला.
दरम्यान, पोलिसांकडून रात्रीभर संशयिताचा शोध सुरू असतानाच शनिवारी पहाटे इंदिरानगर पोलीस ठाण्याच्या हद्दीतील जॉगिंग ट्रॅक परिसरात एका झाडाला तरुणाचा मृतदेह लटकलेल्या अवस्थेत आढळला. वैष्णवीची हत्या केल्यानंतर त्याने स्वतःचेही जीवन संपवले असावे, असा प्राथमिक संशय पोलिसांनी व्यक्त केला आहे.
या दुहेरी मृत्यूच्या घटनेमुळे नाशिक शहरात मोठी खळबळ उडाली असून, या संपूर्ण प्रकरणाचा पुढील सखोल तपास इंदिरानगर पोलीस करत आहेत.