पुणे शहरातील मुंढवा परिसरात घडलेल्या एका धक्कादायक प्रकरणात भाजपच्या विधी शाखेचा स्थानिक अध्यक्ष ॲड. संजय सावंत याला त्याच्या कार्यालयातील सेक्रेटरीच्या खून प्रकरणी अटक करण्यात आली आहे.
पुणे (Murder Case Pune) : पुणे शहरातील मुंढवा परिसरात घडलेल्या एका धक्कादायक प्रकरणात भाजपच्या विधी शाखेचा स्थानिक अध्यक्ष ॲड. संजय सावंत याला त्याच्या कार्यालयातील सेक्रेटरीच्या खून प्रकरणी अटक करण्यात आली आहे. या गुन्ह्यात सावंतसोबत त्याची पत्नी स्वाती सावंत आणि त्यांच्या अल्पवयीन मुलीचाही सहभाग असल्याचा आरोप असून, तिघांनाही पोलिसांनी ताब्यात घेतले आहे. या घटनेत मृत झालेल्या महिलेचे नाव पूनम दिनेश मुन (वय ३५) असे आहे.
मिळालेल्या माहितीनुसार, पूनम मुन या गेल्या साडेतीन वर्षांपासून सावंत यांच्या मुंढवा येथील कार्यालयात सहाय्यक (सेक्रेटरी) म्हणून कार्यरत होत्या. दरम्यान, पूनम आणि संजय सावंत यांच्यात अनैतिक संबंध असल्याचा संशय सावंत यांची पत्नी स्वाती हिला होता. याच संशयातून दोघींमध्ये वारंवार वाद होत असल्याची माहिती समोर आली आहे.
घटनेच्या दिवशी, गुरुवारी (१६ एप्रिल) पूनम नेहमीप्रमाणे कार्यालयात गेल्या होत्या. त्यानंतर दुपारच्या सुमारास संजय सावंत, त्याची पत्नी आणि मुलीने मिळून पूनम यांना मारहाण केल्याचा आरोप आहे. यावेळी त्यांच्या पायांना दोरीने बांधून बॅटने बेदम मारहाण करण्यात आली. या गंभीर मारहाणीत पूनम यांचा मृत्यू झाला.
घटनेनंतर आरोपींनी मृतदेह पोत्यात भरून कार्यालयातच लपवून ठेवल्याचे समोर आले आहे. पुढील दिवशी मृतदेहाची विल्हेवाट लावण्याचा त्यांचा प्रयत्न होता, अशी माहिती तपासातून पुढे आली आहे.
दरम्यान, पूनम घरी न परतल्याने त्यांच्या कुटुंबीयांनी शोधाशोध सुरू केली. त्यांच्या पती दिनेश यांनी दिवसभर संपर्क करण्याचा प्रयत्न केला; मात्र प्रतिसाद न मिळाल्याने त्यांनी रात्री उशिरा पोलिस ठाण्यात तक्रार दाखल केली.
पुढील दिवशी सकाळी पूनम यांचे पती उद्धव मुन सावंत यांच्या कार्यालयात गेले असता, त्यांना तेथे एक संशयास्पद पोते दिसले. ते उघडून पाहिल्यानंतर त्यात पूनम यांचा मृतदेह आढळून आल्याने एकच खळबळ उडाली.
या प्रकरणाची माहिती मिळताच पोलिसांनी तत्काळ कारवाई करत संजय सावंत, स्वाती सावंत आणि त्यांच्या अल्पवयीन मुलीला अटक केली आहे. पुढील तपास सुरू असून, या घटनेमुळे परिसरात मोठी खळबळ उडाली आहे.