112 Number Misuse: ११२ क्रमांकावर विनाकारण फोन करून लोकसेवकाला त्रास दिल्याप्रकरणी सेनगाव तालुक्यातील एका युवकावर नरसी नामदेव पोलीस ठाण्यात गुन्हा दाखल करण्यात आला आहे.
हिंगोली (112 Number Misuse) : ११२ क्रमांकावर विनाकारण फोन करून लोकसेवकाला त्रास दिल्याप्रकरणी सेनगाव तालुक्यातील एका युवकावर नरसी नामदेव पोलीस ठाण्यात गुन्हा दाखल करण्यात आला आहे. पोलीसांनी दिलेल्या माहितीनुसार, १ ऑगस्ट रोजी सायंकाळी ५.४७ ते ८.३६ वाजेदरम्यान आरोपी बळीराम दत्तराव देवकर रा. देवकरवाडी ता. सेनगाव याने ११२ या आपत्कालीन क्रमांकावर सात वेळा डायल करून 'माझ्यासोबत एक इसम भांडण करत आहे' अशी खोटी माहिती दिली.
लोकसेवकाला त्रास होण्याच्या उद्देशाने ही खोटी माहिती दिल्याने नरसी नामदेव पोलीस ठाण्याचे अंबादास ज्ञानबा गायकवाड यांच्या फिर्यादीवरून आरोपीविरुद्ध गुन्हा नोंदवण्यात आला आहे. सदर घटनेतील गुन्ह्याचा तपास सपोउपनी दिघाडे हे करत आहेत. आपत्कालीन ११२ क्रमांकाचा गैरवापर करणार्यांवर कठोर कारवाई केली जाईल. नागरिकांनी गरज नसताना या क्रमांकावर फोन करू नये, असे आवाहन पोलिसांनी केले आहे.