माहूर येथील ‘१०२’ रुग्णवाहिका चालकांच्या मानधनाचा प्रश्न सुटला

आमदार संतोष बांगर यांच्या मध्यस्थीनंतर वरिष्ठ अधिकाऱ्यांना तात्काळ सूचना

हिंगोली (Mahur Ambulance Drivers) : नांदेड जिल्ह्यातील माहूर येथील ‘१०२’ रुग्णवाहिका वाहनचालकांच्या प्रलंबित मानधनाचा (पगार) प्रश्न अखेर मार्गी लागला आहे. या संदर्भातील तक्रार घेऊन वाहनचालकांनी १२ जून रोजी कळमनुरी विधानसभा मतदारसंघाचे आमदार संतोष बांगर यांची भेट घेतली. चालकांच्या अडचणी जाणून घेताच आमदार बांगर यांनी मुंबईतील वरिष्ठ अधिकाऱ्यांशी थेट संपर्क साधून हा प्रश्न तातडीने निकाली काढण्यासाठी सूचना दिल्या. त्यामुळे वाहनचालकांनी समाधान व्यक्त करत त्यांचे आभार मानले आहेत.

मिळालेल्या माहितीनुसार, माहूर येथील ‘१०२’ रुग्णवाहिका चालकांना इतर जिल्ह्यांतील चालकांच्या तुलनेत कमी मानधन मिळत होते. दिवस-रात्र रुग्णसेवा करूनही आर्थिक अडचणींचा सामना करावा लागत असल्याने चालकांमध्ये नाराजी होती. इतर जिल्ह्यांप्रमाणेच समान मानधन मिळावे, या मागणीसाठी त्यांनी आमदार संतोष बांगर यांची भेट घेऊन आपली व्यथा मांडली.

आमदार बांगर यांचा तात्काळ हस्तक्षेप

वाहनचालकांनी सादर केलेल्या निवेदनाची दखल घेत आमदार संतोष बांगर यांनी विलंब न करता मुंबईतील आरोग्य विभागाच्या वरिष्ठ अधिकाऱ्यांशी भ्रमणध्वनीवरून संपर्क साधला. इतर जिल्ह्यांच्या तुलनेत माहूर येथील चालकांवर अन्याय का होत आहे, असा सवाल उपस्थित करत त्यांनी पगारातील तफावत दूर करण्यासाठी तात्काळ कार्यवाही करण्याच्या सूचना दिल्या.

चालकांकडून समाधान व्यक्त

आमदारांच्या हस्तक्षेपानंतर वरिष्ठ अधिकाऱ्यांनी सकारात्मक प्रतिसाद देत हा प्रश्न लवकरात लवकर मार्गी लावण्याचे आश्वासन दिले. लोकप्रतिनिधीने तातडीने दखल घेऊन वरिष्ठ स्तरावर पाठपुरावा केल्याने वाहनचालकांमध्ये समाधानाचे वातावरण निर्माण झाले आहे. ऐन अडचणीच्या काळात पाठीशी उभे राहिल्याबद्दल माहूर येथील ‘१०२’ रुग्णवाहिका चालकांनी आमदार संतोष बांगर यांचे आभार व्यक्त केले.