महावितरणच्या अधिक्षक अभियंत्याची 10 लाख रुपयाने फसवणुक; गुन्हा दाखल

हिंगोली (Mahavitaran Engineer Fraud) : महावितरणचे अधिक्षक अभियंता राजेशसिंग चव्हाण यांच्या मोबाईलवर तुमच्या घराचे महानगर गॅस पाईपलाईनचे पैसे थकीत असल्याने कनेक्शन बंद करीत असल्याचे सायबर भामट्याने सांगुन ईपीके फाईल पाठविण्यात आली होती. चव्हाण यांनी ही ई पीके फाईल उघडल्यानंतर त्यांच्या बँक खात्यातील १० लाख रुपये सायबर भामट्याने काढून घेतल्याने हिंगोली शहर पोलिसात गुरूवारी गुन्हा दाखल करण्यात आला.

याबाबत पोलिस सुत्रांनी दिलेली माहिती अशी की, (Mahavitaran Engineer Fraud) महावितरणचे अधिक्षक अभियंता राजेशसिंग माधवसिंग चव्हाण यांचे मुंबई येथे घर असुन ५ एप्रिल रोजी त्यांना एका अनोळखी मोबाईल क्रमांकावरून संपर्क साधून आपले नाव दिपक जोशी असल्याचे सांगितले. तसेच तुमच्या घराचे महानगर गॅस पाईपलाईनचे पैसे थकीत असल्याने तुमचे कनेक्शन बंद करीत असल्याचे सांगताच चव्हाण यांनी थकीत रक्कम भरण्या करीता सहमती दर्शविली. याच संधीचा फायदा सायबर भामट्याने घेऊन चव्हाण यांच्या मोबाईलवर ईपीके फाईल पाठवली. ही फाईल डाऊनलोड झाल्यानंतर चव्हाण यांना ओटीपी मागितला. त्यानंतर चव्हाण यांनी ओटीपी दिल्यावर त्यांचा मोबाईल बंद करून चव्हाण यांच्या बँक खात्यातून दोन वेळा प्रत्येकी ५- ५ लाख रुपये असे एकुण १० लाख रुपये काढून घेतले. ही रक्कम काढून घेतल्याचा संदेश चव्हाण यांना आला नसल्याने त्यांना काहीसा संशय बळावला.

यावेळी त्यांनी ई मेल तपासल्यानंतर त्यांच्या बँक खात्यातून ५ एप्रिलला २ वेळा ५ - ५ लाख रुपये काढल्याचे दिसून आले. यावरून आपली (Mahavitaran Engineer Fraud) फसवणुक झाल्याचे दिसून येताच राजेशसिंग चव्हाण ९ एप्रिलला हिंगोली शहर पोलिसात तक्रार देऊन १० लाख रुपयाची ऑनलाईन फसवणुक झाल्याचे नमुद केले. यावरून हिंगोली शहर पोलिसात दिपक जोशी मोबाईल ६२००६९२०७५ ७६३४९३ ४९३९ आणि मोबाईल क्र. ९३२४३७००५२ यांच्यावर माहिती तंत्रज्ञान अधिनियम २००० अन्वये गुन्हा दाखल करण्यात आला. ही फसवणुक ऑनलाईनव्दारे असल्याने हिंगोली शहर पोलिसांनी सायबर सेलची मदत घेण्यास सुरूवात केली आहे. या प्रकरणाचा पुढील तपास पोलिस निरीक्षक संदिप मोदे हे करीत आहेत.