पाठपुराव्याला यश; आलेगाव-अकोला बस सेवा पूर्ववत सुरू

पातूर (Alegaon-Akola Bus) : "आमचे काम बोलते" हे पुन्हा एकदा सिद्ध करत, आलेगाव परिसरातील प्रवाशांच्या अत्यंत जिव्हाळ्याच्या प्रश्नाला मार्गी लावण्यात सामाजिक कार्यकर्ते निलेश तोताराम कापकर यांना मोठे यश आले आहे. आलेगाव–अकोला एस.टी. बस सेवा पूर्ववत सुरू ठेवण्याच्या त्यांच्या आग्रही मागणीची प्रशासनाने दखल घेतली असून, आज सकाळी १०:३० वाजता ही बस सेवा पुन्हा नियमितपणे सुरू करण्यात आली.

आलेगाव आणि (Alegaon-Akola Bus) परिसरातील शेकडो विद्यार्थ्यांचे शैक्षणिक नुकसान टाळण्यासाठी, तसेच शिक्षक, शासकीय व खासगी कर्मचारी आणि सर्वसामान्य प्रवाशांची होणारी गैरसोय लक्षात घेऊन निलेश कापकर यांनी महाराष्ट्र राज्य मार्ग परिवहन महामंडळाच्या संबंधित अधिकाऱ्यांकडे सातत्याने पाठपुरावा केला होता. अखेर या पाठपुराव्याला यश आल्याने संपूर्ण आलेगाव परिसरात समाधानाचे वातावरण निर्माण झाले आहे.

बसस्थानकावर जल्लोषात स्वागत

बस सेवा पुन्हा सुरू झाल्याच्या आनंदात आलेगाव बसस्थानकावर आज सकाळी ग्रामस्थांनी मोठी गर्दी केली होती. (Alegaon-Akola Bus) बस स्थानकावर दाखल होताच प्रवाशांनी व नागरिकांनी तिचे उत्स्फूर्त स्वागत केले. या छोटेखानी कार्यक्रमाचे नेटके सूत्रसंचालन बाळाभाऊ सरोदे यांनी केले. या प्रसंगी सामाजिक कार्यकर्ते निलेश तोताराम कापकर यांनी एस.टी.चे चालक व वाहक यांचा शाल आणि पुष्पगुच्छ देऊन जाहीर सत्कार केला. तसेच, आलेगाववासीयांच्या वतीने महाराष्ट्र राज्य मार्ग परिवहन महामंडळाचे व संबंधित अधिकाऱ्यांचे जाहीर आभार मानले. यावेळी नितीन ढोणे, रवींद्र द्याईत, सुनील महल्ले, सचिन गिऱ्हे, उमेश राऊत, पुरुषोत्तम आवटे, रवी तायडे, चोथवे काका, यनकर भाऊ यांच्यासह परिसरातील नागरिक आणि प्रवासी मोठ्या संख्येने उपस्थित होते.