चंद्रपूर-गडचिरोली-वर्धा स्थानिक स्वराज्य संस्था मतदारसंघातून होणाऱ्या विधान परिषद निवडणुकीसाठी महाविकास आघाडीच्या उमेदवाराचे नाव जवळपास निश्चित झाल्याची माहिती सूत्रांकडून मिळत आहे.
चंद्रपूर (Maha Vikas Aghadi) : चंद्रपूर-गडचिरोली-वर्धा स्थानिक स्वराज्य संस्था मतदारसंघातून होणाऱ्या विधान परिषद निवडणुकीसाठी महाविकास आघाडीच्या उमेदवाराचे नाव जवळपास निश्चित झाल्याची माहिती सूत्रांकडून मिळत आहे. काँग्रेसचे ज्येष्ठ नेते व वर्धा येथील रहिवासी शैलेश अग्रवाल यांच्या नावावर सहमती झाल्याचे बोलले जात आहे.
चंद्रपूर येथे आयोजित काँग्रेसच्या महत्त्वपूर्ण बैठकीत उमेदवार निवडीबाबत सविस्तर चर्चा करण्यात आली. या बैठकीस काँग्रेसचे निरीक्षक आमदार विजय वडेट्टीवार, खासदार प्रतिभा धानोरकर तसेच माजी मंत्री रणजीत कांबळे उपस्थित होते. स्थानिक स्वराज्य संस्थांमधील राजकीय समीकरणे, मतांचे गणित आणि निवडणुकीची रणनीती यावर सविस्तर चर्चा झाल्यानंतर शैलेश अग्रवाल यांच्या नावाला प्राधान्य देण्यात आल्याची माहिती आहे.
शैलेश अग्रवाल हे महाराष्ट्र प्रदेश काँग्रेस कमिटीचे सदस्य असून काँग्रेस किसान सेलचे राष्ट्रीय समन्वयक म्हणूनही कार्यरत आहेत. काँग्रेसकडून लवकरच अधिकृत उमेदवारांची यादी जाहीर केली जाण्याची शक्यता असून त्यामध्ये शैलेश अग्रवाल यांच्या नावाची घोषणा होऊ शकते.
मात्र, स्थानिक स्वराज्य संस्थांतील मतांचे गणित जुळवून आणणे आणि महाविकास आघाडीतील सर्व घटक पक्षांची मते एकत्रित ठेवणे हे त्यांच्यासमोरील मोठे आव्हान असणार आहे.