परभणीत एलपीजी अ‍ॅटो जळून खाक; वसंतराव नाईक पुतळा परिसरातील घटना

परभणी (LPG Auto Burn) : शहरातील वसमत रोडवरील वसंतराव नाईक पुतळा परिसरात बुधवार   १ एप्रिल  रोजी सकाळी ११ वाजेच्या सुमारास एका एलपीजीवर चालणार्‍या ऑटो रिक्षाला अचानक आग लागून तो पूर्णतः जळून खाक झाला. सुदैवाने ऑटोमध्ये प्रवासी नसल्याने मोठी जीवितहानी टळली.

 घटने बाबत अधिक माहिती अशी की, शहरातील वसमत रोड परिसरात बुधवारी  सकाळी ११ वाजण्याच्या सुमारास हि घटना घडली.  एमएच २२ एपी ३२४२ क्रमांकाचा एलपीजीवर चालणारा ऑटो रिक्षा बसस्थानकावर प्रवासी सोडून वसमतरोडकडून काळीकमानकडे जात असताना अचानक (LPG Auto Burn) त्याच्या मागील बाजूस धूर निघू लागला. चालकाने तत्काळ ऑटो थांबवून पाहणी केली असता काही क्षणातच ऑटोने भीषण पेट घेतला. आगीची तीव्रता वाढत गेल्याने परिसरात काही काळ वाहतुकीची कोंडी निर्माण झाली. ऑटोमध्ये एलपीजी गॅस असल्यामुळे नागरिकांनी सुरक्षेच्या दृष्टीने जवळ जाणे टाळले. दरम्यान, डायल ११२ वर कार्यरत पोशि रायबोळे यांनी तत्काळ वरिष्ठांना माहिती देत अग्निशमन दलाला पाचारण केले.

अग्निशमन दलाच्या पथकाने घटनास्थळी धाव घेत आगीवर नियंत्रण मिळवले. मात्र तोपर्यंत ऑटो पूर्णपणे जळून खाक (LPG Auto Burn) झाला होता. या घटनेत सुदैवाने कोणतीही जीवितहानी झाली नाही. सदर ऑटो रिक्षाचे मालक ज्ञानेश्वर शंकरराव दामोदर (रा. पिंगळी) हे असल्याचे समजते. घटनास्थळी वाहतूक शाखेचे पोउपनि बनाटे, एएसआय सिद्दिकी, लोखंडे, सपकाळ तसेच महिला पोलिस कर्मचारी उपस्थित होते. तसेच नवा मोंढा पोलिस ठाण्याचे पोलिस निरीक्षक महादेव माजरमकर आदिनी भेट दिली. 

प्रशासनाने आर्थिक मदत देण्याची मागणी

या (LPG Auto Burn) घटनेत एलपीजीवर चालणारा ऑटो पूर्णत: जळून खाक झाल्याने संबंधित चालकाचे मोठे आर्थिक नुकसान झाले आहे. रोजंदारीवर आपला उदरनिर्वाह करणार्‍या या चालकासाठी हा ऑटोच उत्पन्नाचे एकमेव साधन असल्याने त्याच्यासमोर आता उपजीविकेचा गंभीर प्रश्न उभा राहिला आहे. अचानक ओढवलेल्या या संकटामुळे त्याच्या कुटुंबावरही आर्थिक अडचणींचे सावट निर्माण झाले आहे. त्यामुळे अशा आपत्तीग्रस्त चालकाला शासन व प्रशासनाने तातडीने आर्थिक मदत देऊन दिलासा द्यावा अशी मागणी नागरिकांमधून होत आहे.