वर्धा-चंद्रपूर-गडचिरोली स्थानिक स्वराज्य संस्था मतदारसंघाच्या विधान परिषद निवडणुकीची रणधुमाळी सुरू झाली असून सर्वच राजकीय पक्षांनी मोर्चेबांधणीला वेग दिला आहे.
वर्धा (Legislative Council Election) : वर्धा-चंद्रपूर-गडचिरोली स्थानिक स्वराज्य संस्था मतदारसंघाच्या विधान परिषद निवडणुकीची रणधुमाळी सुरू झाली असून सर्वच राजकीय पक्षांनी मोर्चेबांधणीला वेग दिला आहे. राज्यातील सर्वात मोठा पक्ष म्हणून ओळखल्या जाणाऱ्या भाजपकडून अद्याप अधिकृत उमेदवाराची घोषणा करण्यात आलेली नसल्याने बंडखोरीची भीती तर वाटत नाही ना, असा प्रश्न राजकीय वर्तुळात उपस्थित होत आहे.
विशेष म्हणजे उमेदवार जाहीर झालेला नसतानाही भाजपच्या नगरसेवकांना चंद्रपूर येथे अर्ज भरण्याच्या कार्यक्रमासाठी उपस्थित राहण्याचे निमंत्रण देण्यात आले असल्याची माहिती समोर आली आहे.
भाजपकडून उमेदवाराची घोषणा शेवटच्या टप्प्यात करण्यामागे पक्षांतर्गत असंतोष किंवा संभाव्य बंडखोरी टाळण्याचा प्रयत्न असल्याची चर्चा राजकीय वर्तुळात रंगू लागली आहे. उमेदवार लवकर जाहीर झाल्यास इच्छुक उमेदवार किंवा त्यांचे समर्थक नाराज होऊन बंडखोरीची भूमिका घेऊ शकतात, अशी भीती पक्ष नेतृत्वाला असल्याचे बोलले जात आहे. त्यामुळे योग्य वेळ साधून अधिकृत उमेदवाराचा अर्ज दाखल केला जाणार असल्याची माहिती सूत्रांकडून मिळत आहे.
ही निवडणूक सहज होईल असे चित्र नाही. विरोधकांकडूनही जोरदार तयारी सुरू असून मतदारांची संख्या आणि संभाव्य राजकीय समीकरणे लक्षात घेता या निवडणुकीला मोठे महत्त्व प्राप्त झाले आहे. त्यामुळे भाजपला केवळ विरोधकांशीच नव्हे तर पक्षांतर्गत नाराजी आणि गटबाजीशीही सामना करावा लागू शकतो.
उमेदवार निवडीचा अंतिम निर्णय पक्षाच्या वरिष्ठ नेतृत्वाकडून होणार असल्याने स्थानिक पातळीवरील नेत्यांमध्येही उत्सुकता वाढली आहे. राजकीय विश्लेषकांच्या मते ही निवडणूक अत्यंत अटीतटीची होण्याची शक्यता आहे. भाजपकडून अधिकृत उमेदवाराची घोषणा कधी होणार याकडे कार्यकर्ते आणि राजकीय निरीक्षकांचे लक्ष लागले आहे. उमेदवार निश्चित झाल्यानंतरच निवडणुकीचे चित्र अधिक स्पष्ट होणार असून सध्या मात्र राजकीय चर्चांना आणि तर्कवितर्कांना जोर आला आहे. त्यामुळे वर्धा-चंद्रपूर-गडचिरोली विधान परिषद निवडणूक यंदा अत्यंत चुरशीची आणि प्रतिष्ठेची लढत ठरण्याची चिन्हे दिसून येत आहेत.
दरम्यान, वर्धा, चंद्रपूर आणि गडचिरोली स्थानिक स्वराज्य संस्थांच्या विधान परिषद निवडणुकीसाठी उद्या भाजपकडून अधिकृत उमेदवाराचा अर्ज दाखल केला जाणार आहे. याकरिता वर्धा नगर परिषदेच्या सदस्यांना सकाळी १० वाजता चंद्रपूर येथील ‘निवडणूक निर्णय अधिकारी’ कार्यालयात उपस्थित राहावे, असा संदेश भाजप नेत्यांकडून पाठवण्यात आल्याची माहिती मिळत आहे.