Patur Police Case : सोनेरी नाण्यांचा मोठा साठा स्वस्तात विकण्याचे आमिष दाखवून कोल्हापूर येथील एका व्यक्तीची तब्बल १५ लाख रुपयांची फसवणूक केल्याची घटना उघडकीस आली आहे.
पातूर (Patur Police Case) : सोनेरी नाण्यांचा मोठा साठा स्वस्तात विकण्याचे आमिष दाखवून कोल्हापूर येथील एका व्यक्तीची तब्बल १५ लाख रुपयांची फसवणूक केल्याची घटना उघडकीस आली आहे. याप्रकरणी पातूर पोलिसांनी एका आरोपीविरुद्ध भारतीय न्याय संहिता (BNS) कलम ३१८(४) अन्वये गुन्हा दाखल केला आहे.
पोलिसांनी दिलेल्या माहितीनुसार, फिर्यादी युवराज चांदोबा कांबळे (वय ४९, रा. शिवपार्वती पार्क, ओम साई निवास, वडणगे, ता. करवीर, जि. कोल्हापूर) यांनी दिलेल्या तक्रारीवरून गणेश रमेश इंगळे याच्याविरुद्ध गुन्हा दाखल करण्यात आला आहे.
तक्रारीनुसार, आरोपीने ३० जून २०२६ रोजी फिर्यादीला फोन करून पूर्वी हॉटेलमध्ये झालेल्या ओळखीचा आधार घेत आपल्या बहिणीचे घर पाडताना सुमारे साडेतीन किलो वजनाच्या सोन्याच्या नाण्यांचा माठ सापडल्याचे सांगितले. हा ऐवज ५० लाख रुपयांत विकण्याची तयारी असल्याचेही त्याने सांगितले.
विश्वास संपादन करण्यासाठी आरोपीने एक नाणे फिर्यादीला दिले. ते नाणे सोनाराकडे तपासणीसाठी नेले असता ते खरे सोने असल्याचे आढळल्याने फिर्यादीचा आरोपीवर विश्वास बसला. त्यानंतर ४ जुलै २०२६ रोजी नांदखेड फाटा (ता. पातूर) येथे फिर्यादीने आरोपीला रोख १५ लाख रुपये दिले. त्याबदल्यात आरोपीने सुमारे ३ किलो ३०० ग्रॅम वजनाची नाणी दिली.
मात्र, नंतर सर्व नाण्यांची तपासणी केली असता ती बनावट असल्याचे निष्पन्न झाले. (Patur Police Case) आपली फसवणूक झाल्याचे लक्षात आल्यानंतर फिर्यादीने पातूर पोलिस ठाण्यात तक्रार दाखल केली. त्यावरून सहाय्यक फौजदार (ASI) चव्हाण यांनी अप. क्र. ३४२/२०२६ अन्वये गुन्हा नोंदविला असून पुढील तपास सुरू आहे. या प्रकरणात फॉरेन्सिक पथकाची भेट झालेली नाही.