राष्ट्रवादी शरद पवार गटाचा तहसीलदारांना आंदोलनाचा इशारा

देऊळगाव राजा (Fuel Shortage Trouble) : खरीप हंगाम तोंडावर असताना तालुक्यात निर्माण झालेल्या डिझेल-पेट्रोल टंचाईमुळे शेतकरी आणि ट्रॅक्टर व्यावसायिक अडचणीत सापडले असून, शेती मशागतीसाठी आवश्यक इंधन तातडीने उपलब्ध करून द्यावे, अन्यथा शेतकऱ्यांसह तीव्र आंदोलन छेडण्यात येईल, असा इशारा राष्ट्रवादी काँग्रेस पक्ष – शरदचंद्र पवार गटाच्या वतीने तहसीलदारांना देण्यात आला आहे.

राष्ट्रवादीच्या वतीने सादर करण्यात आलेल्या निवेदनात म्हटले आहे की, सध्या खरीप पेरणीपूर्व मशागतीची कामे वेगाने सुरू आहेत. बहुतांश शेतकऱ्यांकडे बैल नसल्याने ट्रॅक्टरच्या साह्याने नांगरणी, पेरणी, फवारणी व इतर शेतीकामे केली जातात. मात्र तालुक्यात डिझेल आणि पेट्रोलचा तुटवडा निर्माण झाल्याने अनेक ट्रॅक्टर बंद पडले आहेत. काही पेट्रोल पंपांवर इंधन उपलब्ध नसून, ज्या ठिकाणी डिझेल मिळत आहे तेथेही मर्यादित प्रमाणातच पुरवठा केला जात असल्याने शेतकऱ्यांची मोठी गैरसोय होत आहे.

इंधनअभावी शेतीची महत्त्वाची कामे वेळेत पूर्ण होत नसल्याने उत्पादनावर परिणाम होण्याची भीती व्यक्त करण्यात आली आहे. आधीच नैसर्गिक संकटे, वाढलेले उत्पादन खर्च आणि महागाईमुळे शेतकरी आर्थिक अडचणीत सापडला असताना इंधनटंचाईने त्याच्या समस्यांमध्ये अधिक भर पडली आहे. तसेच मोटारसायकलद्वारे व्यवसाय करणारे व सामान्य नागरिकांनाही पेट्रोलअभावी दैनंदिन कामकाजात अडथळे निर्माण होत असल्याचे निवेदनात नमूद करण्यात आले आहे.

तालुक्यातील सर्व पेट्रोल पंपांवर शेतकरी (Fuel Shortage Trouble) व नागरिकांना आवश्यक प्रमाणात डिझेल-पेट्रोल उपलब्ध करून देण्यासाठी प्रशासनाने तातडीने उपाययोजना कराव्यात, अन्यथा मोठा जनआक्रोश निर्माण होऊन आक्रमक आंदोलन उभारले जाईल, असा इशाराही राष्ट्रवादीच्या पदाधिकाऱ्यांनी दिला आहे. या निवेदनावर तालुकाध्यक्ष राजेश इंगळे, माजी पंचायत समिती सभापती सुधाकर म्हस्के, गणेश बुरकूल, गणेश सवडे, शिवाजी कोल्हे, काकासाहेब म्हस्के, शेख कदीर, शेषराव कोल्हे, माजी सभापती महेश देशमुख, बबनराव डोके, शहराध्यक्ष विष्णू रामाने, सुनिल म्हस्के, अशोक शेळके आदींच्या स्वाक्षऱ्या आहेत.