नैऋत्य मान्सूनच्या दमदार आगमनानंतर मुंबईत मुसळधार पावसाने जोरदार हजेरी लावली आहे.
लोकल सेवा विस्कळीत, शाळांना सुट्टी; मुंबई, उपनगरांसह पालघरमध्ये पुढील २४ तास मुसळधार पावसाचा इशारा
मुंबई (IMD Red Alert) : नैऋत्य मान्सूनच्या दमदार आगमनानंतर मुंबईत मुसळधार पावसाने जोरदार हजेरी लावली आहे. मंगळवारी रात्रीपासून सुरू असलेल्या संततधार पावसामुळे शहरातील अनेक सखल भाग जलमय झाले असून, उपनगरीय रेल्वे सेवांवर परिणाम झाला आहे. परिस्थिती लक्षात घेता प्रशासनाने शाळा बंद ठेवण्याचा निर्णय घेतला असून, भारतीय हवामान विभागाने (IMD) मुंबई, उपनगर आणि पालघर जिल्ह्यासाठी रेड अलर्ट जारी केला आहे.
महापालिकेच्या आकडेवारीनुसार, बुधवारी सकाळी ८ वाजेपर्यंतच्या २४ तासांत मुंबई शहरात सरासरी १९५ मिमी, पश्चिम उपनगरात २०८ मिमी, तर पूर्व उपनगरात १६७ मिमी पावसाची नोंद झाली. काही भागांमध्ये २०० मिमीपेक्षा अधिक पाऊस झाल्याने रस्त्यांवर मोठ्या प्रमाणात पाणी साचले आणि हजारो नागरिकांच्या दैनंदिन प्रवासात अडथळे निर्माण झाले.
भारतीय हवामान विभागाने पुढील २४ तासांत मुंबई आणि उपनगरांमध्ये मेघगर्जना, विजांच्या कडकडाटासह मध्यम ते मुसळधार पावसाचा अंदाज व्यक्त केला आहे. याच पार्श्वभूमीवर मुंबई, उपनगर आणि पालघर जिल्ह्यासाठी रेड अलर्ट जारी करण्यात आला आहे.
यंदा नैऋत्य मान्सूनने मंगळवारी मुंबईत प्रवेश केला. मान्सूनचे आगमन नेहमीच्या तारखेपेक्षा १३ दिवस उशिरा झाले असले, तरी आगमनानंतर शहर आणि उपनगरांमध्ये व्यापक स्वरूपात पाऊस झाला. यामुळे उकाड्यापासून नागरिकांना दिलासा मिळाला असला, तरी मुसळधार पावसामुळे वाहतूक आणि जनजीवन विस्कळीत झाले आहे.
दरम्यान, मंगळवारी सकाळी ६ वाजेपर्यंतच्या मागील २४ तासांत मुंबईला पाणीपुरवठा करणाऱ्या तलावांच्या पाणलोट क्षेत्रात एकूण ८९ मिमी पावसाची नोंद झाली. यामध्ये मिडल वैतरणा येथे सर्वाधिक ५५ मिमी, भातसा येथे १६ मिमी, तर मोडक सागर येथे १३ मिमी पावसाची नोंद झाली. विहार आणि तुळशी तलाव परिसरात मात्र पावसाची नोंद झालेली नाही. यंदाच्या हंगामात आतापर्यंत या पाणलोट क्षेत्रात एकूण १०८ मिमी पाऊस झाला आहे.
मुसळधार पावसामुळे शहरातील सखल भागांमध्ये पाणी साचले असून, रस्ते वाहतूक आणि उपनगरीय रेल्वे सेवांवर त्याचा परिणाम झाला आहे. प्रशासन परिस्थितीवर लक्ष ठेवून असून नागरिकांनी आवश्यक तेवढ्याच कामासाठी घराबाहेर पडावे आणि हवामान विभागाच्या सूचनांचे पालन करावे, असे आवाहन करण्यात आले आहे.