परभणीतील नानलपेठ हद्दीत अवैध दारू वाहतुकीवर स्थागुशाचा छापा

शहरातील जेल कॉर्नर परिसरात कारवाई; दोन आरोपींसह ९५ हजारांचा मुद्देमाल जप्त

परभणी (Illegal Liquor) : शहरातील नानलपेठ पोलीस ठाणे हद्दीतील जेल कॉर्नर परिसरात स्थानिक गुन्हे शाखेने अवैध देशी दारू वाहतुकीवर धडक कारवाई करत दोन आरोपींना ताब्यात घेतले. या कारवाईत देशी दारूच्या १९२ बाटल्या व मोटारसायकल असा एकूण ९५ हजार ३६० रुपयांचा मुद्देमाल जप्त करण्यात आला. याबाबत नानलपेठ पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, रणजीतसिंग बिनासिंग टाक (वय ३५, रा. साकला प्लॉट, परभणी) व किरण किशोर पाष्टे (वय ४८, रा. हडको, नूतन कॉलनी, परभणी) हे दोघेही होंडा युनिकॉर्न मोटारसायकल क्र. एमएच २२ एएस १३१२ वरून विनापरवाना देशी दारूची चोरटी विक्री करण्यासाठी वाहतूक करत असल्याची माहिती स्थानिक गुन्हे शाखेला मिळाली होती. त्या अनुषंगाने जेल कॉर्नर परिसरात सापळा रचून पोलिसांनी कारवाई केली.

यावेळी आरोपींकडून भिंगरी संत्रा १८० एमएलच्या १९२ बाटल्या किंमत १५ हजार ३६० रुपये व ८० हजार रुपये किमतीची मोटारसायकल असा एकूण ९५ हजार ३६० रुपयांचा मुद्देमाल जप्त करण्यात आला. दोन्ही आरोपींना ताब्यात घेऊन पुढील कायदेशीर कार्यवाहीसाठी नानलपेठ पोलीस ठाण्यात हजर करण्यात आले.

ही कारवाई वरिष्ठांच्या आदेशानुसार विवेकानंद पाटील यांच्या मार्गदर्शनाखाली सपोनी जगताप, पोउपनि. परिहार, सय्यद उमर, पांगरकर, प्रवीण घोंगडे, रफीयोद्दीन शेख व प्रमोद पुरी यांनी संयुक्तपणे केली.

अवैध दारूवर आणखी एक छापा; दारू साठा जप्त

बुधवार, २० मे रोजी परभणी शहरातील नानलपेठ हद्दीत तुकाराम प्रभाकर पाईकराव (वय ४५, रा. शाहू नगर, परभणी) हे पाथरी रोड, शाहू नगर येथे अवैधरित्या दारू विक्री करताना आढळून आले. स्थानिक गुन्हे शाखेच्या पथकाने छापा टाकत आरोपीसह १७ हजार ९३० रुपयांची अवैध दारू जप्त केली. याप्रकरणी नानलपेठ पोलीस ठाण्यात विविध कलमानुसार गुन्हा दाखल करण्यात आला असून पुढील तपास नानलपेठ पोलिस करत आहेत. सदरची कारवाई स्थागुशाच्या पथकाने केली.