Illegal sand transport: हिंगोलीत तहसीलदारांनी अवैध रेती वाहतूक करणारा टिप्पर पकडला. टिप्पर व रेतीसह 15 लाखाचा मुद्देमाल जप्त करण्यात आला, चालकाविरुद्ध गुन्हा दाखल.
अवैध रेती व टिप्पर सह 15 लाखाचा मुद्देमाल जप्त
हिंगोली शहर पोलीस ठाण्यात गुन्हा दाखल
हिंगोली (Illegal sand transport) : तालुक्यातील खांबाळा येथील लाभार्थ्यांना मोफत रेतीचे वाटप करून हिंगोलीकडे परतत असताना तहसीलदार श्रीकांत रमेश भुजबळ व त्यांच्या पथकाने 27 एप्रिलला पळशी रोडवर अवैध रेती वाहतूक करणारा टिप्पर रंगेहाथ पकडला. या कारवाईत १५ लाख रुपये किमतीचा हायवा टिप्पर व तीन ब्रास रेती जप्त करण्यात आली असून चालकाविरुद्ध गुन्हा दाखल झाला आहे.
मिळालेल्या माहितीनुसार, तहसीलदार श्रीकांत भुजबळ हे सोमवार, २७ एप्रिल रोजी ईडोळीचे ग्राम महसूल अधिकारी विनोद ठाकरे यांच्या समवेत खांबाळा येथील लाभार्थ्यांना मोफत रेतीचे वाटप करून सायंकाळी ५ ते ५:३० वाजेच्या सुमारास हिंगोलीकडे येत होते. खुशाल नगर, अंबिका कमान, पळशी रोड परिसरात त्यांना एमएच ३८ डी ९१७७ क्रमांकाचा भारत बेंझ कंपनीचा पिवळा टिप्पर संशयास्पदरीत्या जाताना दिसला. तहसीलदार व त्यांच्या पथकातील कर्मचाऱ्यांनी तात्काळ वाहन थांबवून तपासणी केली.
चौकशीदरम्यान टिप्पर चालक सचिन दिलीप सरकटे, वय २९, रा. साबलखेडा ता. सेनगाव याच्याकडे (Illegal sand transport) रेती वाहतुकीचा कोणताही शासकीय परवाना आढळला नाही. वाहनात अंदाजे ३ ब्रास रेती होती. रेती कोठून आणली व कुठे नेत आहोत याबाबत चालकाने समाधानकारक माहिती दिली नाही. वाहन मालकाचे नावही त्याला सांगता आले नाही.
अवैधरित्या गौण खनिजाची (Illegal sand transport) चोरटी वाहतूक होत असल्याची खात्री झाल्याने तहसीलदार भुजबळ यांनी पथकाच्या मदतीने टिप्पर व चालकाला ताब्यात घेतले. वाहन थेट हिंगोली शहर पोलीस ठाण्यात आणण्यात आले. सरकारतर्फे फिर्यादी होऊन श्रीकांत भुजबळ यांनी रात्री ९:०८ वाजता लेखी तक्रार दिली. या तक्रारीवरून पोलिसांनी रात्री ९:१७ वा. गु.र.क्र. ०२७९ नोंदवला. आरोपी सचिन सरकटे याच्याविरुद्ध भारतीय न्याय संहिता कलम ३०३(२), महाराष्ट्र जमीन महसूल संहिता कलम ४८(७) व ४८(८) आणि पर्यावरण संरक्षण अधिनियम १९८६ चे कलम ९ व १५ अन्वये गुन्हा दाखल आहे. जप्त टिप्परची किंमत १५ लाख तर रेतीची किंमत १२ हजार रुपये आहे.
या (Illegal sand transport) प्रकरणाचा तपास हेड कॉन्स्टेबल मोहमद अहमद शेख करीत आहेत. तहसीलदार भुजबळ यांनी दिलेल्या फिर्यादीत पथकातील कर्मचाऱ्यांच्या नावांचा उल्लेख नसला तरी, पथकाच्या सतर्कतेमुळेच ही कारवाई यशस्वी झाल्याचे प्रशासनाकडून सांगण्यात आले. अवैध रेती उपशाला आळा घालण्यासाठी महसूल विभागाची धडक मोहीम सुरूच राहणार असल्याचे तहसीलदार श्रीकांत भुजबळ यांनी स्पष्ट केले.