मतदार यादीतील त्रुटी दूर करण्यासाठी जिल्हाधिकाऱ्यांचा क्षेत्रीय आढावा; बीएलओंना दिले काटेकोर कामाचे निर्देश

वसमत (Voter List SIR) : हिंगोली जिल्ह्यातील मतदार यादीचे विशेष सखोल पुनरीक्षण कार्यक्रमांतर्गत सुरू असलेल्या कामाचा आढावा घेण्यासाठी जिल्हाधिकारी राहुल गुप्ता यांनी रविवारी वसमत तालुक्यातील विविध भागांना भेटी दिल्या. ३० जून २०२६ पासून सुरू झालेल्या या मोहिमेत मतदान केंद्रस्तरीय अधिकारी म्हणजेच बीएलओ घराघरी जाऊन मतदारांची प्रत्यक्ष पडताळणी करत आहेत. जिल्ह्यात यासाठी एकूण १०१५ बीएलओंची नियुक्ती करण्यात आली असून उपविभागीय अधिकारी हे मतदार नोंदणी अधिकारी म्हणून काम पाहत आहेत. त्यांना मदत करण्यासाठी भारत निवडणूक आयोगामार्फत ३७ सहाय्यक मतदार नोंदणी अधिकाऱ्यांचीही नियुक्ती करण्यात आली आहे.  

या मोहिमेचा मुख्य उद्देश प्रत्येक पात्र मतदाराचा समावेश मतदार यादीत करणे आणि अपात्र मतदारांची नावे वगळणे हा आहे. बीएलओ हे काम कोणत्या पद्धतीने करत आहेत, मतदारांना कोणत्या अडचणी येत आहेत याची माहिती घेण्यासाठी जिल्हाधिकाऱ्यांनी थेट मतदारांशी संवाद साधला. तसेच प्रसारमाध्यमांच्या प्रतिनिधींशी बोलून या मोहिमेची प्रभावी अंमलबजावणी व्हावी यासाठी आवाहन केले. जिल्हाधिकाऱ्यांनी सांगितले की मतदारांनी आपले गणना फॉर्म वेळेत भरून द्यावेत. मृत, दुबार किंवा स्थलांतरित मतदारांबाबत राजकीय पक्षांनी नेमलेल्या मतदान केंद्रस्तरीय प्रतिनिधींनी बीएलओंना सहकार्य करावे. या कामात हलगर्जीपणा करणाऱ्या बीएलओंवर कडक कारवाई करण्यात येईल असा इशाराही त्यांनी दिला.  

यावेळी उपजिल्हा निवडणूक अधिकारी श्रीमती प्रगती चोंडेकर यांच्यासह सर्व मतदार नोंदणी अधिकारी, सहाय्यक मतदार नोंदणी अधिकारी आणि निवडणूक विभागातील अधिकारी उपस्थित होते. वसमत तालुक्यातील प्रसारमाध्यम प्रतिनिधीही या बैठकीला हजर होते.  

जिल्हाधिकाऱ्यांनी मतदारांना आवाहन केले की गणना प्रपत्र भरून देण्यासाठी आपल्या मतदान केंद्रस्तरीय अधिकाऱ्यांशी संपर्क साधावा. जिल्ह्यातील सर्व बीएलओंची नावे आणि संपर्क क्रमांक जिल्ह्याच्या संकेतस्थळावर उपलब्ध करून देण्यात आले आहेत. काही अडचण असल्यास उपविभागीय अधिकारी किंवा तहसिलदार यांच्याशी संपर्क साधता येईल. मतदारांनी फॉर्मवर आधार क्रमांक, मोबाईल क्रमांक तसेच आई आणि वडिलांचे नाव नोंदवावे. २००२ च्या मतदार यादीची मॅपिंगची माहिती बीएलओंकडे उपलब्ध आहे, ती मतदाराला माहिती असल्यास त्यांनी लिहावी अन्यथा बीएलओ ती नोंदवतील.  

एका कुटुंबातील मतदार वेगवेगळ्या यादी भागात विभागले गेले असल्यास ५ ऑगस्ट २०२६ रोजी प्रारूप मतदार यादी प्रसिद्ध झाल्यानंतर ५ ऑगस्ट ते ४ सप्टेंबर या कालावधीत दावे आणि हरकती सादर करून एकाच यादी भागात नाव समाविष्ट करून घेता येईल. तसेच एकाच व्यक्तीच्या नावाने प्रोजेनी मॅपिंग झाले असल्यास आई किंवा वडिलांपैकी इतर नावाने मॅप करून घ्यावे असेही स्पष्ट करण्यात आले.  

विशेष सखोल पुनरीक्षण कार्यक्रमाचे वेळापत्रकही यावेळी जाहीर करण्यात आले. ३० जून ते २९ जुलै दरम्यान बीएलओ घरोघरी जाऊन अर्जांचे वाटप करतील. ५ ऑगस्टला प्रारूप मतदार यादी प्रसिद्ध होईल. ५ ऑगस्ट ते ४ सप्टेंबरपर्यंत हरकती आणि सूचना स्वीकारल्या जातील. ५ ऑगस्ट ते ३ ऑक्टोबरपर्यंत हरकतींवरील सुनावणी होईल आणि ७ ऑक्टोबरला अंतिम मतदार यादी प्रसिद्ध केली जाईल. ९२ वसमत, ९३ कळमनुरी आणि ९४ हिंगोली या तीनही विधानसभा मतदारसंघांतील मतदान केंद्रस्तरीय अधिकाऱ्यांच्या कामाचा आढावा यावेळी घेण्यात आला.