उपराजधानीतील मानकापूर पोलीस ठाण्याच्या हद्दीत एका १६ वर्षीय अल्पवयीन मुलीचा विनयभंग झाल्याची धक्कादायक घटना समोर आली आहे.
नागपूर (Harassment Of Minor Girl) : उपराजधानीतील मानकापूर पोलीस ठाण्याच्या हद्दीत एका १६ वर्षीय अल्पवयीन मुलीचा विनयभंग झाल्याची धक्कादायक घटना समोर आली आहे. ही घटना २१ एप्रिल रोजी दुपारी ३ वाजण्याच्या सुमारास घडली असून, पोलिसांनी तात्काळ कारवाई करत ३९ वर्षीय आरोपीला अटक केली आहे.
मिळालेल्या माहितीनुसार, पीडित मुलगी रस्त्याने पायी जात असताना आरोपी शैलेशकुमार नेवाराम पटेल (वय ३९) याने तिचा पाठलाग केला. त्याने मुलीशी बोलण्याचा प्रयत्न करत तिच्याशी गैरवर्तन केले तसेच चुकीच्या पद्धतीने स्पर्श केल्याचा आरोप आहे. अचानक घडलेल्या या प्रकारामुळे मुलगी घाबरून घरी परतली आणि तिने संपूर्ण घटना पालकांना सांगितली.
यानंतर कुटुंबीयांनी तातडीने मानकापूर पोलीस ठाण्यात धाव घेत तक्रार दाखल केली. पोलिसांनी तांत्रिक तपासाच्या आधारे आरोपीचा शोध घेत त्याला ताब्यात घेतले. प्राथमिक तपासात आरोपीने गुन्ह्याची कबुली दिल्याचे पोलिसांनी सांगितले आहे.
दरम्यान, वैद्यकीय तपासणीत आरोपी दारूच्या नशेत असल्याचे निष्पन्न झाले आहे. पोलिसांनी त्याच्यावर विनयभंग आणि POCSO कायद्यानुसार गुन्हा दाखल केला असून पुढील तपास सुरू आहे.
या घटनेमुळे परिसरात खळबळ उडाली असून नागरिकांमध्ये संतापाचे वातावरण निर्माण झाले आहे.