नागपुरात खेळता-खेळता घडली दुर्दैवी घटना; ११ वर्षीय मुलाचा गळफास लागून मृत्यू

प्रतापनगर परिसरातील शेवाळकर अपार्टमेंटमधील घटना; कुत्र्याच्या पट्ट्यामुळे अपघाती मृत्यू झाल्याचा प्राथमिक अंदाज

नागपूर (Hanging Incident) : प्रतापनगर पोलिस ठाण्याच्या हद्दीतील शेवाळकर अपार्टमेंटमध्ये घडलेल्या एका हृदयद्रावक घटनेत ११ वर्षीय मुलाचा मृत्यू झाल्याने परिसरात हळहळ व्यक्त केली जात आहे. मल्हार अनमोल रंगारी (वय ११) असे मृत मुलाचे नाव असून, घरात खेळत असताना घडलेल्या अपघातामुळे त्याचा जीव गेल्याचा प्राथमिक निष्कर्ष पोलिसांनी नोंदवला आहे.

मल्हार हा सहाव्या इयत्तेत शिक्षण घेत होता. त्याचे वडील खासगी कंपनीत कार्यरत आहेत, तर आई बँकेत नोकरी करते. घटना घडली त्यावेळी दोघेही आपल्या कामावर गेले होते. घरात मल्हार, त्याची मोठी बहीण आणि आजी उपस्थित होती.

माहितीनुसार, दुपारच्या सुमारास मल्हार आणि त्याची बहीण घरामध्ये खेळत होते. काही वेळाने मल्हार एका खोलीत गेला आणि त्याने खोलीचे दार आतून बंद केले. बराच वेळ उलटूनही तो बाहेर न आल्याने बहिणीला संशय आला. तिने अनेकदा हाक मारूनही प्रतिसाद न मिळाल्याने आजीला याची माहिती दिली.

यानंतर दुसऱ्या चावीच्या मदतीने खोली उघडण्यात आली. दार उघडताच मल्हार बेशुद्ध अवस्थेत आढळून आला. त्याच्या गळ्याभोवती कुत्र्याचा पट्टा अडकलेला असल्याचे दिसून आले. घटनेची माहिती तत्काळ आई-वडिलांना देण्यात आली. शेजाऱ्यांच्या सहकार्याने त्याला तातडीने रुग्णालयात हलविण्यात आले. मात्र, वैद्यकीय तपासणीनंतर डॉक्टरांनी त्याला मृत घोषित केले.

घटनेची माहिती मिळाल्यानंतर प्रतापनगर पोलिसांनी घटनास्थळी धाव घेत पंचनामा केला. प्राथमिक चौकशीत, कुतूहलापोटी मल्हारने खिडकीला बांधलेला कुत्र्याचा पट्टा गळ्यात घातला असावा, अशी शक्यता तपासली जात आहे. त्यावेळी तो चाक असलेल्या खुर्चीवर उभा होता. अचानक संतुलन बिघडल्याने खुर्ची सरकल्याचा आणि त्यामुळे पट्टा गळ्याभोवती आवळला गेल्याचा प्राथमिक अंदाज पोलिसांनी व्यक्त केला आहे.

या प्रकरणी अकस्मात मृत्यूची नोंद करण्यात आली असून पुढील तपास सुरू आहे. या दुर्दैवी घटनेमुळे रंगारी कुटुंबावर दुःखाचा डोंगर कोसळला असून परिसरातील नागरिकांनीही शोक व्यक्त केला आहे.